Read Papiamento Salmo 102 Bible Online

Salmo 102 - Papiamento bible

Salmo 102

¹Orashon di un hende flihí, ora e ta serka di pèrdè speransa i ta deshogá su kurason dilanti di Dios. SEÑOR, skucha mi orashon, laga mi gritu yega serka Bo.

²No skonde bo Kara pa mi, awor, na mi ora di mester. Paga atenshon na mi, mi ta yama: rospondé mi lihé!

³Pasobra mi dianan ta kaba na huma, mi wesunan ta kima manera un fogon.

⁴Mi kurason parse yerba, seku, marchitá, mi ta asta lubidá di kome pan.

⁵Komo mi ta keha asina duru, mi kueru a kohe mi wesunan.

⁶Mi parse un para di mondi, un palabrua ku ta biba den ruinanan.

⁷Mi n' ta pega soño, mi ta keha, manera un para ku ta so riba dak.

⁸Mi enemigunan ta pil di mi sin fin, nan ta zundra mi i ta plega mi nòmber.

⁹En bes di pan mi ta kome shinishi, mi bibida ta mesklá ku aw'i wowo,

¹⁰pa motibu di bo rabia i bo furia: Bo a hisa mi benta mi afó.

¹¹Mi dianan ta bai manera sombra di atardi, mi mes ta para seka meskos ku yerba.

¹²Sinembargo, SEÑOR, bo trono t'ei pa semper, generashonnan tras di otro lo menta bo nòmber.

¹³Sí, lo Bo lanta i sinti duele di Sion, pasobra e ora pa Bo tene piedat di dje, e ora stipulá, a yega!

¹⁴Bo sirbidónan, ai, ta stima su piedranan, ku duele nan ta mira su ruina.

¹⁵Nashonnan lo honra bo nòmber, SEÑOR, tur rei di mundu bo gloria,

¹⁶ora SEÑOR bolbe lanta Sion i ora E aparesé den su gloria,

¹⁷ora E skucha orashon di hende sin amparo i no despresiá nan pidimentu.

¹⁸Mester skibi esaki pa esnan ku t'ei mañan, pa e pueblo, ku e ora ei ta kreá, kanta alabansa di SEÑOR:

¹⁹SEÑOR a mira abou fo'i su lugá den altura, El a mira for di shelu riba tera,

²⁰pa E tende kehamentu di hende na kadena, pa libra hende destiná pa muri;

²¹pa nan proklamá SEÑOR su nòmber na Sion i kanta su alabansa na Herusalèm,

²²ora pueblonan i reinonan lo basha bini huntu pa ofresé nan sirbishi na SEÑOR.

²³El a kibra mi forsa na kaminda, El a hasi mi bida mas kòrtiku.

²⁴Mi di: ‘Mi Dios, no laga mi bai awor ku mitar so di mi bida a pasa; bo añanan ta dura mashá siglo!’

²⁵Bo a funda mundu den prinsipio, shelu ta obra di bo man.

²⁶Nan lo peresé, ma Bo ta keda, tur lo gasta manera un bistí. Bo ta kambia nan manera paña bieu, nan ta bira kos di buta un banda.

²⁷Ma Abo ta keda semper meskos, lo no tin fin na bo añanan.

²⁸Nos yunan, bo sirbidónan, lo biba fo'i peliger i nan yunan lo no kita mas fo'i bo presensia.