Read Papiamento Salmo 104 Bible Online

Salmo 104 - Papiamento bible

Salmo 104

¹Mi alma, alabá SEÑOR, SEÑOR mi Dios, esta grandi Bo ta! Bo ta bistí ku splendor i mahestat,

²lorá den un mantel di lus. Bo a span shelu manera un tènt;

³Bo a planta pilánan di bo salanan riba e awa[76] aya den altura, ta laga nubianan sirbi Bo di garoshi, ta drif riba alanan di bientu;

⁴ta usa bientu komo mensahero, vlam di kandela pa sirbiente!

⁵B'a pone mundu riba su fundeshi, pa nunka mas e no tambaliá.

⁶B'a tap'é ku bistí di oséano, awa tabata pará te riba serunan,

⁷ma ora Bo a skual e el a hui, na kareda pa zonido di bo bos,

⁸subiendo serunan, bahando den vayenan na e lugá ku Abo a mustr'é.[77]

⁹B'a pone límite ku nunka e n' por pasa, nunka mas l'e no subi tera.

¹⁰Bo ta manda awa di fuentenan bai pa riu ku ta kore den serunan,

¹¹awa pa bestia di mondi por bebe i pa buriku di mondi kita set.

¹²Ei banda para di shelu tin nan nèshi, por tende nan kanto den rama.

¹³Bo ta laga awa yobe riba seru fo'i den bo salanan altu na shelu; tera ta yena di fruta di bo obranan.

¹⁴Bo ta pone yerba krese pa bestia i planchi bèrdè pa hende kultivá nan, pa e gana pan for di tera,

¹⁵biña pa alegrá su kurason, zeta pa lombra su kara i alimento ku lo tin ku dun'é forsa.

¹⁶SEÑOR su palunan ta haña hopi awa, e sedernan di Libanon, plantá ku su man.

¹⁷Ayaden para ta traha nan nèshi, óyevar tin su kas den nan tòp;[78]

¹⁸kabritu di mondi ta den seru i marmòt shimaron den kueba di baranka.

¹⁹Bo a traha luna ku su fasenan solo sa ki ora e mester baha.

²⁰Bo ta trese skuridat i ta anochi, bestia di mondi tur ta kuminsá move.

²¹Yu di leon ta grita yen di gana, reklamando nan kuminda serka Dios.

²²Ku solo sali nan ta bolbe i nan ta kai drumi den nan kueba.

²³Hende ta sali bai traha, e ta bai su trabou te anochi.

²⁴Ki inkontabel ta bo obranan, SEÑOR! Bo a traha nan tur ku saber, tera ta yen di bo rikesa.

²⁵Ata laman, asina hanchu, espasioso, pimpá di animal inkontabel, bestia grandi i chikitu.

²⁶Aya barkunan ta sigui nan kaminda, ayaden tambe ta biba Leviatan, ku Bo a forma pa Bo hunga kuné.

²⁷Nan tur ta spera di Bo ku lo Bo duna nan kuminda na tempu.

²⁸Ora Bo duna nan, nan ta rekoh'é; ora Bo habri bo man, nan ta yena nan barika ku bo biennan.

²⁹Ora Bo skonde bo Kara nan ta spanta; ku Bo kita nan rosea nan ta muri i ta bolbe bira stòf manera ántes.

³⁰Bo manda bo spiritu, ata nan ta kreá i Bo ta renobá kara di tera.

³¹Mare gloria di SEÑOR por ta eterno, ku SEÑOR por gosa di su obranan.

³²Si E wak tera, esaki ta tembla, k'E toka serunan, nan ta saka huma.

³³Mi ke kanta pa SEÑOR henter mi bida, kanta alabá mi Dios tanten ku mi tin bida i rosea.

³⁴Mare E por gusta mi palabranan, mi mes ta haña mi goso den SEÑOR!

³⁵Ku pekadónan kaba riba mundu i no sobra malechornan mas! Mi alma, alabá SEÑOR! Alabá sea SEÑOR!