Read Papiamento Salmo 109 Bible Online

Salmo 109 - Papiamento bible

Salmo 109

¹Pa maestro di kanto. Di David. Un salmo. Dios ku mi ta alabá, no keda ketu:

²pasobra nan a habri kontra mi un boka baho i yen di engaño;

³nan ta papia ku mi ku lenga falsu — tur rònt di mi palabranan di odio — i nan ta ataká mi sin motibu.

⁴Komo danki pa mi amor: persekushon, miéntras ami — ta resa mi ta resa!

⁵Nan ta paga mi bon ku malu i odio komo preis pa mi amor. (Enemigu:)

⁶‘Nombra un kriminal komo su hues i pone un akusadó; laga su propio abogado akus'é.

⁷Na huisio e sali kulpabel, su orashon mes konta pa krímen!

⁸Mare su dianan por ta kontá i un otro por haña su puesto.

⁹Laga su yunan bira wérfano anto su esposa keda biuda.

¹⁰Laga su yunan kana dualu pidi limosna i hende asta saka[81] nan fo'i nan bohio.

¹¹Laga fiadó di plaka konfiská tur loke e tin i strañeronan haña su biennan, ganá ku sodó di su frenta.

¹²Ningun hende no mustr'é kompashon, ningun no kai na pena di su wérfanonan,

¹³Ku su futuro por keda ruiná i su nòmber por ta lubidá ya despues di ún generashon.

¹⁴Laga SEÑOR kòrda kulpa di su grandinan i no kita piká di su mama;

¹⁵SEÑOR tene esei semper su dilanti, pa E kita nan rekuerdo fo'i mundu.’ (Salmista:)

¹⁶O, ni kòrda mes e no a kòrda di sinti kompashon ku hende; el a persiguí un hende pober, desampará ku kurason kibrá, ku intenshon pa dal e mata.

¹⁷El a stima maldishon: lag'é kai riba dje! El a nenga bendishon: wèl, e keda leu!

¹⁸El a bisti maldishon manera paña: lag'é drenta su paden manera awa, manera zeta penetrá te den su wesunan.

¹⁹E maldishon sea p'e manera paña ku e ta tapa su kurpa kuné, manera un faha, bistí tur dia bai.

²⁰Asina sea, di parti di SEÑOR, e pago di esnan ku ta keha mi i ku ta buta boka riba mi.

²¹Ma Abo, SEÑOR mi Dios, trata mi bon, sea fiel na bo nòmber; bo amor ta bondadoso, salba mi,

²²ami, mizerabel i pober, ku kurason profundamente heridá.

²³Mi bida ta bai manera un sombra di atardi, manera un dalakochi sakudí for di kurpa.

²⁴Mi rudianan ta tembla di yuna, mi kurpa a para seka, tur tisgá.

²⁵Mi a bira mofa di hende, nan ta mira mi i sakudí nan kabes.

²⁶Yuda mi, SEÑOR, mi Dios! Salba mi konforme bo bondat,

²⁷pa nan sa ku esaki ta bo man, ku Abo, SEÑOR, a hasié.

²⁸Laga nan maldishoná, si nan ke, ma Abo manda mi bendishon; si nan lanta — bèrgwensa pa nan, ma alegria pa mi, bo sirbidó.

²⁹Mare esnan ku keha mi por ta rondoná di menospresio, lorá den un mantel di bèrgwensa.

³⁰Mi ke gaba SEÑOR na bos altu, alab'É meimei di e muchedumbre,

³¹pasobra E ta pará band'i pober, pa salba su bida for di man di esnan ku ya a konden'é.