Read Papiamento Salmo 118 Bible Online

Salmo 118 - Papiamento bible

Salmo 118

¹Duna grasia na SEÑOR, komo E ta bon, — su amor ta eterno!

²Laga Israel bisa awor: — su amor ta eterno!

³Laga tur saserdote bisa awor: — su amor ta eterno!

⁴Tur sirbidó di SEÑOR, bisa awor: — su amor ta eterno!

⁵Den mi ansha mi a sklama na SEÑOR, SEÑOR a tende i a duna mi rosea.

⁶SEÑOR ta ku mi, p'esei mi n' tin miedu, anto kiko hende por hasi mi?

⁷SEÑOR ta ku mi, E ta yuda mi; ta p'esei mi por mira derota di tur esnan ku ta odia mi.

⁸Buska refugio serka SEÑOR ta mihó ku busk'é serka hende.

⁹Buska refugio serka SEÑOR ta mihó ku dependé di hende altu.

¹⁰Tur nashon a changa mi, ma den nòmber di SEÑOR m'a machiká nan.

¹¹Nan a changa mi, sera mi aden, ma den nòmber di SEÑOR m'a machiká nan.

¹²Manera abeha nan a rondoná mi, un kandel'i taki seku — el a paga! ma den nòmber di SEÑOR m'a machiká nan.

¹³Nan a stot mi, pusha mi pa mi kai, pero SEÑOR a kore bin yuda mi.

¹⁴Mi ta kanta pa SEÑOR, E ta mi forsa, El a trese mi salbashon.

¹⁵Tende e gritu di alegria i triunfo! Ta den tèntnan di pueblo di Dios: man di SEÑOR a mustra su poder!

¹⁶Man di SEÑOR ta alsá! Man di SEÑOR a mustra su poder!

¹⁷Lo mi no muri, nò, lo mi biba i lo mi konta di SEÑOR su hazañanan.

¹⁸SEÑOR a bati mi mal batí, pero no a pèrmití pa mi muri.

¹⁹Habri portanan santu pa mi, mi ke drenta i alabá SEÑOR.

²⁰Ata e porta di SEÑOR akí, tur e fielnan ta pasa den dje.

²¹Mi t'alabá bo pasobra B'a skucha mi, pasobra B'a manda mi salbashon.

²²E piedra, rechasá p'e trahadónan, esei a bira piedra prinsipal;

²³ta trabou di SEÑOR esei, ta algu milagroso pa mira!

²⁴Awe t'e dia ku SEÑOR a traha, ban kanta di alegria i hasi fiesta!

²⁵O SEÑOR, duna nos salbashon, o SEÑOR, duna prosperidat.

²⁶Bendishoná ta esun ku ta bini den nòmber di SEÑOR. Nos, for di tèmpel di SEÑOR ta risibí boso ku bendishon.

²⁷SEÑOR ta Dios, E ta manda nos lus. Forma proseshon, rama den man, kana te na kachunan di altá.

²⁸Bo ta mi Dios, mi ke gradisí Bo, mi ke alabá Bo, mi Dios.

²⁹Duna grasia na SEÑOR, komo E ta bon: — su amor ta eterno!