Read Papiamento Salmo 119 Bible Online

Salmo 119 - Papiamento bible

Salmo 119

¹ Felis t'esnan ku nan andá ta sin mancha, siguiendo lei di SEÑOR!

²Felis esnan ku ta warda su preseptonan i ta busk'É di kurason,

³ku sin kometé nada malu ta sigui su kamindanan!

⁴Bo a ordená pa bo dekretonan ta opservá estriktamente.

⁵O mare mi por keda semper fiel den kumplimentu ku bo òrdunan,

⁶anto lo mi n' sinti bèrgwensa ora mi fiha bo mandatonan.

⁷Ku sinseridat di kurason mi ta alabá Bo, siñá pa bo dekretonan hustu.

⁸Lo mi keda fiel na bo leinan, Abo no bandoná mi.

⁹Kon un hóben su andá por keda limpi? Si e warda bo palabra.

¹⁰Mi ta buska Bo di henter mi kurason, no laga mi desviá di bo òrdunan.

¹¹Mi ta warda bo palabra den mi alma, pa mi no peka kontra Bo.

¹²SEÑOR, bendishoná Bo mester ta, siña mi bo leinan.

¹³Lo mi ripití na bos altu loke bo boka a ordená.

¹⁴Mi ta gosa e kaminda di bo huisionan manera tur sorto di rikesa.

¹⁵Mi ke meditá bo mandamentunan i fiha bo kamindanan.

¹⁶Mi tin mi plaser den bo preseptonan, lo mi no lubidá bo palabra.

¹⁷Trata bo sirbiente pa mi biba i lo mi warda bo palabra.

¹⁸Habri mi wowo pa mi mira tur maravia di bo lei.

¹⁹Mi ta un peregrino riba mundu, no skonde bo mandatonan pa mi.

²⁰Mi alma ta muri di anhelo pa bo dekretonan, tur ora.

²¹Bo ta skual e malditu arogantenan, ku ta dualu leu di bo òrdunan.

²²Kita insulto i despresio fo'i mi, komo m'a warda bo preseptonan.

²³Ounke shon grandinan ta uni pa nan kònkel kontra mi bo sirbidó ta meditá bo leinan.

²⁴Bo huisionan, nan ta mi delisia, nan ta mi konsehero.

²⁵Ata mi den stòf: duna mi bida konforme bo promesa.

²⁶M'a konfesá Bo mi andá i B'a skucha mi, siña mi bo preseptonan.

²⁷Mustra mi e direkshon di bo dekretonan pa mi studia bo milagernan.

²⁸Mi ta yora di fèrdrit, lanta mi, konforme bo promesa.

²⁹Warda mi pa mi n' kohe mal kaminda, den bo bondat duna mi bo lei.

³⁰Mi ke kohe kaminda di bèrdat, pone bo òrdunan dilanti.

³¹Mi ta tene mi na bo huisionan, SEÑOR, no brongosá mi,

³²Mi ta kore lihé riba e kaminda ku bo mandamentunan ta mustra: Bo ta aliviá mi kurason.

³³SEÑOR, mustra mi e kaminda di bo òrdunan, pa mi kan'é te na fin.

³⁴Habri mi mente pa mi kumpli ku bo lei, pa mi ward'é di kurason.

³⁵Pone mi sigui direkshon di bo mandatonan, pasobra nan ta mi goso.

³⁶Dirigí mi kurason na bo preseptonan, mas bien ku na ganashi.

³⁷Kita mi bista for di kosnan sin balor, laga mi biba, siguiendo bo kaminda.

³⁸Loke B'a primintí bo sirbidó kumpli kuné pa nos teme Bo.

³⁹Kita bèrgwensa fo'i mi, mi n' por want'é, ya ku bo leinan ta bon.

⁴⁰Mira kuantu mi ta stima bo dekretonan. Duna mi bida! Bo n' ta hustu?

⁴¹SEÑOR, laga mi sinti bo bondat, bo salbashon primintí.

⁴²Anto mi por rospondé mi ofensornan, den bo palabra mi ta konfia.

⁴³Pone mi papia bèrdat tur ora, mi tin konfiansa den bo òrdunan.

⁴⁴Mi ke kumpli ku bo lei tur ora bai, semper, den tur eternidat.

⁴⁵Lo mi por kana unda ku mi ke, konsultando bo dekretonan.

⁴⁶Lo mi konta reinan di bo huisionan, i lo mi n' sinti ripara.

⁴⁷Goso profundo mi tin den bo mandatonan ku mi ta stima tantu.

⁴⁸Mi ta habri man pa bo preseptonan stimá, ta meditá bo mandamentunan.

⁴⁹Kòrda e palabra ku B'a duna bo sirbiente, e ta duna mi konfiansa.

⁵⁰Mi konsuelo den tristesa ta esaki: ku bo promesa a rebibá mi.

⁵¹Hende sobèrbè ta ofendé mi sin fin, ma mi n' ke kita fo'i bo lei.

⁵²Kòrdamentu di bo òrdunan antiguo ta konsolá mi, SEÑOR.

⁵³Rabia ta drenta mi, si mi mira mal hende kibra bo siñansa.

⁵⁴Bo mandamentunan a bira mi kansion, den mi lugá di destiero.

⁵⁵SEÑOR, anochi mi ta kòrda bo nòmber i kon ta kumpli ku bo lei.

⁵⁶At'akí loke ta toka mi: warda bo preseptonan.

⁵⁷Mi di: SEÑOR, mi porshon, esei ta: warda bo palabranan.

⁵⁸Di henter mi alma mi ta buska bo fabor: piedat di mi, segun bo promesa.

⁵⁹Mi a saminá mi andá, m'a dirigí mi na bo huisionan.

⁶⁰Mi a hasi purá, mi no a tarda pa obedesé bo mandamentunan.

⁶¹Kabuya di mal hende a mara mi, mi n' lubidá bo preseptonan.

⁶²Meianochi mi ta lanta pa alabá Bo pa bo dekretonan hustu.

⁶³Mi ta amigu di tur ku ta sirbi Bo, ku ta kumpli ku bo òrdunan.

⁶⁴SEÑOR, mundu ta yen di bo amor, siña mi bo leinan.

⁶⁵Ki bondat B'a demostrá bo sirbidó, SEÑOR, konforme bo promesa!

⁶⁶Duna mi sano huisio, komprenshon, mi tin konfiansa den bo òrdunan.

⁶⁷Promé ku topa sufrimentu mi a dualu, ma awor ta bo palabra ta amèn.

⁶⁸Bo ta bon i Bo ta hasi bondat, instruí mi den bo leinan.

⁶⁹Hende tribí a akusá mi di mentira, ami tan fiel na bo preseptonan!

⁷⁰Nan kurason ta será, puru vèt, ma mi enkanto ta bo lei.

⁷¹Esta bon ku m'a topa sufrimentu, esei a siña mi bo mandatonan.

⁷²Lei for di bo boka bal mi mas ku mil plaka di oro i plata.

⁷³Bo mannan a traha mi i forma mi; habri mi mente pa mi siña bo mandatonan.

⁷⁴Bo fielnan lo mira ku alegria ku mi tin fe den bo palabra.

⁷⁵Mi sa, SEÑOR, ku bo dekretonan ta hustu, ku B'a flihi mi ku rason.

⁷⁶Bo amor duna mi konsuelo: B'a primintí bo sirbidó!

⁷⁷Si bo ternura alkansá mi, mi ta biba, ya ku bo lei ta mi plaser.

⁷⁸Laga hendenan tribí sinti bèrgwensa, ku nan a maltratá mi sin motibu; ami lo warda bo preseptonan.

⁷⁹Laga bo fielnan bolbe serka mi, nan ku a kapta bo huisionan.

⁸⁰Mi kurason warda bo leinan estriktamente, pa mi no keda brongosá.

⁸¹Mi t'anhelá bo salbashon ansiosamente, den bo palabra mi ta spera.

⁸²Mi wowo t'anhelá bo promesa, mi di: Bo n' ta konsolá mi?

⁸³Maske kurtí manera kueru den huma, mi n' lubidá bo dekretonan.

⁸⁴Kuantu mas bo sirbidó lo tin di warda pa Bo suta esnan ku persiguí mi?

⁸⁵E arogantenan a traha trampa pa mi, ignorando bo lei.

⁸⁶Tur bo òrdunan ta drechi, pues yuda mi: nan ta mi tras sin motibu.

⁸⁷Nan a hera di pone un fin na mi bida riba mundu, ma mi no a bandoná bo mandamentunan.

⁸⁸Den bo bondat laga mi biba, pa mi kumpli ku tur presepto di bo boka.

⁸⁹Bo palabra, SEÑOR, ta eterno, fihá firme den shelu.

⁹⁰Bo fieldat ta pa tur generashon; B'a funda tera: at'é ei.

⁹¹Pa bo palabra tur kos t'ei te dia djawe, tur den bo sirbishi.

⁹²Si bo lei no tabata mi delisia lo mi a muri di tristesa.

⁹³Hamas i nunka lo mi no lubidá bo mandamentunan, pasobra pa nan Bo a duna mi bida nobo.

⁹⁴Ta di Bo mi ta, salba mi, mi ke siña bo òrdunan.

⁹⁵Pekadónan ta lur pa kaba ku mi, ma mi ta studia bo dekretonan.

⁹⁶M'a mira fin di tur loke ta perfekto, ma bo mandato ta sin límite.

⁹⁷Kuantu mi ta stima bo lei! T'e mi ta studia henter dia.

⁹⁸Bo mandamentu ta hasi mi mas sabí ku mi enemigunan ya k'e ta semper mi kompaño.

⁹⁹Mi a gana mas komprenshon ku esnan ku a siña mi, pasobra mi ta studia bo huisionan.

¹⁰⁰Mi tin mas komprenshon ku ansianonan, komo m'a warda bo dekretonan.

¹⁰¹M'a kita pia for di kualke mal kaminda, pa mi warda bo palabra.

¹⁰²Mi no a desviá di bo mandatonan, pasobra t'Abo a siña mi.

¹⁰³Esta dushi, e smak di bo promesa, mas ku miel den mi boka!

¹⁰⁴Mi mente ta habrí pa bo òrdunan, tur mal kaminda mi ta odia.

¹⁰⁵Bo palabra ta un lampi pa mi pia, un lus riba mi kaminda.

¹⁰⁶Mi a hura — i lo mi kumpli — di bai warda bo mandamentunan hustu.

¹⁰⁷Mashá flihí mi ta, SEÑOR, duna mi bida, primintí ta debe.

¹⁰⁸SEÑOR, aseptá e promesanan ku mi boka a hasi Bo; siña mi bo dekretonan.

¹⁰⁹Maske mi bida ta semper na peliger, bo lei mi no ta lubidá.

¹¹⁰Pekadónan a pone trampa pa mi, ma mi n' ta kita fo'i bo òrdunan.

¹¹¹Bo huisionan — pa semper mi tesoro — ta alegrá mi kurason.

¹¹²M'a pone mi pa kumpli ku bo leinan pa semper, te na fin.

¹¹³Mi n' ta gusta ora hende hunga ròl: ami ta stima bo lei.

¹¹⁴Bo ta mi refugio, mi eskudo, mi tin fe den bo palabra.

¹¹⁵Malechornan, bai fo'i mi! Mi ke hasi loke mi Dios ta manda.

¹¹⁶Sostené mi, konforme bo promesa, anto lo mi biba, no konfundí mi speransa.

¹¹⁷Apoyá mi pa mi ta fo'i peliger, i lo mi sigui wak bo huisionan.

¹¹⁸Bo ta rechasá tur hende ku desviá di bo dekretonan, nan astusia ta enbano.

¹¹⁹Pa Bo tur malbado ta basura,[85] ma ami stima bo preseptonan.

¹²⁰Mi kurpa ta rel di spantu pa Bo, mi tin rèspèt di bo òrdunan.

¹²¹Loke ta drechi i hustu mi a hasi, no entregá mi den man di mi opresornan.

¹²²Sali na fabor di bo sirbiente, no laga hende insolente oprimí mi.

¹²³Mi wowo t'anhelá bo salbashon i bo promesa di hustisia.

¹²⁴Trata bo sirbidó, segun bo amor, siña mi bo leinan.

¹²⁵Mi ta bo sirbidó, habri mi mente, pa mi siña bo preseptonan.

¹²⁶Ta tempu pa Bo aktua, SEÑOR: nan a bai kontra bo òrdunan.

¹²⁷P'esei bo mandamentunan bal mi mas ku oro, oro fini.

¹²⁸P'esei mi ta laga bo dekretonan guia mi den tur kos; tur mal kaminda mi ta odia.

¹²⁹Esta atmirabel ta bo huisionan; di henter mi alma mi ta sigui nan.

¹³⁰Bo palabra, si splik'é, ta trese lus, ta hasi bobonan sabí.

¹³¹Mi ta habri mi boka hanchu, golos pa bo mandatonan.

¹³²Drei mira mi i tene kompashon, manera Bo sa hasi ku esnan ku ta stima bo nòmber.

¹³³Guia mi paso segun bo promesa, pa maldat no dominá mi.

¹³⁴Libra mi di preshon di hende, i lo mi warda bo dekretonan.

¹³⁵Laga bo Kara iluminá bo sirbidó i siña mi bo preseptonan.

¹³⁶Roinan di awa ta brota fo'i mi wowo: nan n' tin rèspèt pa bo lei.

¹³⁷SEÑOR, Abo ta hustu i bo òrdunan legítimo.

¹³⁸Bo a saka huisionan hustu, mashá digno di konfiansa.

¹³⁹Mi zelo ta kimami, pasobra mi opresornan no ta kòrda bo palabranan.

¹⁴⁰Bo promesa ta di bon kalidat, bo sirbidó ta stim'é.

¹⁴¹Maske sin balor i despresiá mi n' lubidá bo dekretonan.

¹⁴²Bo hustisia ta hustisia eterno, bo lei ke men bèrdat.

¹⁴³M'a haña mi anshá i den pèrtá, pero m'a gosa bo mandatonan.

¹⁴⁴Bo preseptonan ta bálido pa semper, habri mi mente pa mi biba.

¹⁴⁵Ku tur mi forsa mi ta sklama: SEÑOR, tende, lo mi kumpli ku bo leinan!

¹⁴⁶Mi ta invoká Bo, yuda mi, lo mi warda bo dekretonan.

¹⁴⁷Mardugá grandi ya mi gritu ta subi; den bo palabra mi ta spera.

¹⁴⁸Mi wowo no por warda anochi sera pa meditá bo promesa.

¹⁴⁹Den bo bondat skucha mi bos, o SEÑOR, ku Bo ke, duna mi bida.

¹⁵⁰Nan ku ta plania wega sushi ta serka, ma nan ta leu di bo siñansa.

¹⁵¹Abo mes, SEÑOR, ta serka, tur bo mandatonan ta sólido.

¹⁵²Mashá ten m'a komprondé di bo preseptonan ku Bo a fiha nan pa semper.

¹⁵³Mira mi mizeria, salba mi; bo lei mi no ta lubidá.

¹⁵⁴Defendé mi kousa, reskatá mi, B'a primintié, duna mi bida!

¹⁵⁵Salbashon ta keda leu fo'i malechornan, nan no ta puntra pa bo leinan.

¹⁵⁶Bo ternura, SEÑOR, ta grandi, ku Bo ke, duna mi bida.

¹⁵⁷Mi enemigu- i opresornan ta hopi, ma mi n' ta kita fo'i bo huisionan.

¹⁵⁸Ku avershon mi ta mira e traidornan: nan no ta sigui bo palabra.

¹⁵⁹Mira kon mi ta stima bo dekretonan, piedat, SEÑOR, duna mi bida.

¹⁶⁰Bo palabra ta puru bondat, bo òrdunan hustu ta eterno.

¹⁶¹Shonnan grandi ta mi tras sin motibu: mi kurason ta respetá bo palabra.

¹⁶²Mi ta gosa bo palabra mes tantu ku ora haña un tesoro.

¹⁶³Mi ta odia i detestá falsedat, ma mi ta stima bo lei.

¹⁶⁴Mi t'alabá Bo shete be pa dia pa bo preseptonan hustu.

¹⁶⁵Esnan ku stima bo leinan tin pas grandi, no tin opstákulo pa nan.

¹⁶⁶SEÑOR, mi t'anhelá bo salbashon, loke Bo manda mi ta hasi.

¹⁶⁷Mi kurason ke sigui bo huisionan, mi ta stima nan mashá.

¹⁶⁸Mi ta warda bo dekreto i huisionan, Bo sa tur loke mi ta hasi.

¹⁶⁹Laga mi gritu, SEÑOR, yega te den bo presensia; habri mi mente; sea fiel na bo mes palabra.

¹⁷⁰Hasi pa mi súplika por yega te den bo presensia; Abo, salba mi; sea fiel na bo mes promesa.

¹⁷¹Ku alabansa por brota fo'i mi lepnan; Bo n' ta siña mi bo leinan?

¹⁷²Mare mi boka por kanta bo alabansa, pasobra tur bo mandamentunan ta hustu.

¹⁷³Laga bo man para kla pa yuda mi, komo m'a skohe bo preseptonan.

¹⁷⁴Mi t'anhelá bo salbashon, o SEÑOR, bo lei ta mi enkanto.

¹⁷⁵Mi alma biba pa por kanta bo alabansa, laga bo òrdunan yuda mi.

¹⁷⁶Mi sa dualu — un karné ku a pèrdè — : buska bo sirbiente. Nò, mi no a lubidá bo mandamentunan.