Read Papiamento Salmo 135 Bible Online

Salmo 135 - Papiamento bible

Salmo 135

¹Alabá sea SEÑOR! Alabá nòmber di SEÑOR, alab'É, sirbidónan di SEÑOR

²ku ta sirbi den kas di SEÑOR, riba plenchinan di kas di nos Dios.

³Alabá SEÑOR, E ta bon, kanta gloria di su nòmber tan amabel![89]

⁴Komo SEÑOR a skohe Yakob, Israel pa su propiedat.

⁵Sí, mi sa, SEÑOR ta grandi, nos Señor ta mas grandi ku tur dios.

⁶Kiko ku E ke SEÑOR ta hasi tantu den shelu komo na tera, den laman i den fondo di abismo.

⁷E ta laga nubianan subi for di puntanan ekstremo di mundu, ta manda welek pa awa por kai, ta laga bientu supla fo'i su mangasinanan.

⁸T'E a dal tur yu mayó di Egipto, di hende i tambe di bestia.

⁹El a hasi señal- i milagernan meimei di bo tera, Egipto, kontra Fárao i tur su ofisialnan.

¹⁰El a derotá hopi pueblo i a mata reinan poderoso:

¹¹Sihon, rei di amoritanan i Og, rei di Bashan; El a kaba ku tur reino di Kanaan.

¹²El a duna su pueblo nán pais, pa el a keda propiedat di Israel.

¹³SEÑOR, bo nòmber t'ei pa semper! Tur generashon lo rekordá bo,

¹⁴komo SEÑOR lo sali pa su pueblo, su sirbidónan lo E mustra kompashon.

¹⁵Diosnan pagano ta plata i oro, kosnan trahá pa man di hende.

¹⁶Nan tin boka — ma nan no por papia, nan tin wowo — ma nan no por mira,

¹⁷orea nan tin — ma no por tende, nan no tin rosea den nan boka.

¹⁸Mare[90] esnan ku a traha nan, bira meskos ku nan, sí, tur ku ta konfia riba nan!

¹⁹Pueblo di Israel — bendishoná SEÑOR! Saserdotenan — bendishoná SEÑOR!

²⁰Levitanan — bendishoná SEÑOR! Tur ku ta sirbi SEÑOR — bendishon'É!

²¹Bendishoná sea SEÑOR for di Sion, E ku ta biba na Herusalèm! Alabá sea SEÑOR!