Read Papiamento Salmo 145 Bible Online

Salmo 145 - Papiamento bible

Salmo 145

¹Kantika di alabansa. Di David. Mi Dios, mi Rei, mi ke alsa Bo, alsa bo nòmber pa semper i semper.

²Mi ke bendishoná Bo sin fin, alabá bo nòmber semper bai.

³SEÑOR ta grandi, digno di alabansa, ningun hende no por midi su grandesa.

⁴Ún generashon tras di otro ta kanta gloria di loke Bo a hasi, lo proklamá bo akshonnan poderoso.

⁵Bo mahestat, splendor i gloria nan lo konta i mi ke testiguá di bo milagernan.

⁶Nan lo papia di bo echonan spantoso i mi ke proklamá bo grandesa;

⁷nan lo gaba bo bondat inmenso i nan lo hubilá bo hustisia.

⁸SEÑOR ta kompasivo i tierno, yen di pasenshi i bondat amoroso.

⁹SEÑOR ta bon pa tur loke ta eksistí, yen di ternura pa tur su kriaturanan.

¹⁰Tur bo obranan, SEÑOR, ta elogiá Bo, i tur bo fielnan lo duna Bo alabansa.

¹¹Nan ta kanta gloria di bo reino, bo poder ta tur kaminda papiá,

¹²pa mundu tende di bo obranan potente i di splendor i mahestat di bo reino.

¹³Bo reino ta un reino eterno, bo dominio ta pa tur generashon. SEÑOR ta fiel na tur su promesanan, bondadoso den tur su akshonnan.[94]

¹⁴Esnan na punto di kai E ta wanta, E ta lanta esnan ku ta kargá.

¹⁵Tur ta fiha nan bista riba Bo i Bo ta duna nan kuminda na tempu.

¹⁶Bo ta habri bo man i ta kumpli ku deseo di tur loke tin bida.

¹⁷SEÑOR su moda di hasi ta hustu, E ta bondadoso den su obranan.

¹⁸SEÑOR ta serka esnan ku t'invok'É serka tur ku ta yam'É di kurason.

¹⁹E ta kumpli ku deseo di su fielnan, E ta tende nan gritu i ta salba nan.

²⁰SEÑOR ta warda esnan ku ta stim'É, pero l'E kaba ku tur malechor.

²¹Mi ke kanta alabansa di SEÑOR. Tur ser bibu, elogiá su nòmber santu pa semper, te den tur eternidat!