Read Papiamento Salmo 147 Bible Online

Salmo 147 - Papiamento bible

Salmo 147

¹Alabá sea SEÑOR! Esta bon di kanta himno na nos Dios, sí, ta dushi, alabansa mester zona!

²SEÑOR ta bolbe konstruí Herusalèm, ta trese huntu desteradonan di Israel.

³E ta kura esnan kibrá di kurason, e ta mara tur nan heridanan.

⁴El a fiha e number di streanan, E ta yama kada un na su nòmber.

⁵Nos SEÑOR ta grandi, poderoso, su sabiduria ta sin límite.

⁶SEÑOR ta sostené humildenan, ta humiliá pekadónan te na tera.

⁷Entoná alabansa pa SEÑOR, toka salmo riba arpa pa nos Dios:

⁸E ta tapa shelu ku su nubianan, ta hasi awa kai riba tera ta laga yerba sali riba serunan, matanan pa tur mester di hende.[95]

⁹E ta duna kuminda na bestianan i na yu 'i paranan ora nan ta grita.

¹⁰E n' tin kunes ku brio di kabai, ni ku pia robusto di hòmber.

¹¹E ta gusta esnan ku respet'É i ku ta anhelá su fabornan.

¹²Kanta gloria di SEÑOR, Herusalèm, Sion, alabá bo Dios!

¹³El a pone tranka fuerte na bo portanan, a bendishoná bo yunan denter di bo,

¹⁴a trese pas den henter bo teritorio i ta kria bo ku manteka di trigo.

¹⁵E ta manda su òrdu pa mundu, — kon lihé su palabra ta kore!

¹⁶E ta manda sneu manera lana, ta stroi puiru di eis manera stòf,

¹⁷ta tira eis na pipitanan grandi. Ken por wanta su frialdat?

¹⁸Ún palabra i tur kos ta dirti, k'E manda bientu tur awa ta kore.

¹⁹El a revelá su palabra na Yakob su presepto i leinan na Israel.

²⁰Ningun pueblo E no a trata asina, nan no konosé su leinan. Alabá sea SEÑOR!