Read Papiamento Salmo 15 Bible Online

Salmo 15 - Papiamento bible

Salmo 15

¹Salmo di David. SEÑOR, ken por hospedá den bo tènt, ken por habitá bo seru santu?

²Esun ku ta hiba un bida drechi, ku ta praktiká hustisia i ku semper sa papia bèrdat;

³ku no sa papia malu di hende, no ta hasi daño na su próhimo ni ta pone su kara na bèrgwensa.

⁴E n' tin lei ku hende ku n' ta sirbi, ma ta honra es ku honra SEÑOR. E no ta kibra un huramentu si akaso esaki salié malu.

⁵E n' ta fia su sèn ku estafa, e n' ta laga nan susha su man pa e lanta falsu testimonio kontra hende inosente. Esun ku aktua asina hamas i nunka lo no tambaliá.