Read Papiamento Salmo 16 Bible Online

Salmo 16 - Papiamento bible

Salmo 16

¹Orashon silensioso. Di David. Dios, warda mi, mi ta buska refugio serka Bo;

²mi ta bisa SEÑOR: ‘Bo ta mi Señor, mi felisidat! No tin nada riba Bo!’

³Esnan ku na tera ta pasa pa ‘santu’ i pa ‘poderoso’, mi no tin lei ku nan.[14]

⁴Nan ku ta sirbi otro dios ta buska malu pa nan kurpa;[15] nunka lo mi n' djòin nan sakrifisionan di sanger, nunka mi n' ta tuma nan nòmber den mi boka.

⁵Abo, SEÑOR, mi herensia, mi beker, lo Bo duna mi tur loke mi mester, Bo ta tene mi destino den bo man.

⁶Un parti ekskisito a kai na mi suerte, e loke ta toka mi ta enkantá mi.

⁷Mi ta alabá SEÑOR, ku ta guia mi i asta anochi ta instruí mi kurason.

⁸Semper mi ta tene SEÑOR mi dilanti, si E ta pará na mi man drechi, mi n' ta hera.

⁹P'esei, mi kurason por ta kontentu, mi paden por kanta di legria i mi kurpa sosegá ku konfiansa,

¹⁰ya ku Bo no ta entregá mi na morto, Bo no ta laga bo amigu mira graf.

¹¹Bo ta siña mi ki kaminda ta hiba pa bida, abundansia di legria kaminda Bo ta, goso banda di Bo pa tur eternidat.