Read Papiamento Salmo 17 Bible Online

Salmo 17 - Papiamento bible

Salmo 17

¹Orashon di David. SEÑOR, tende un kos di bèrdat, paga tinu na mi gritu, tende mi súplika, e ta sali for di un boka ku no tin engaño.

²Laga mi sentensia sali for di Bo, laga bo wowo mira kiko ta hustu.

³Bo por tèst mi kurason i samin'é den anochi, purba mi den kandela — Bo no ta haña nada. Ni maske kiko mi pensa, mi boka no ta peka.

⁴Kontrali na loke otro hende ta hasi mi a keda fiel na palabra di bo boka i mi a evitá nan andá violento:

⁵Mi pasonan a sigui bo pista firmemente, mi pianan no a hera nunka.

⁶Mi ta yama Bo, o Dios, komo Bo ta kontestá mi, paga atenshon, skucha mi palabra.

⁷Demostrá bo amor tan milagroso, Abo ku pa forsa di bo man ta salba esun ku skonde serka Bo for di esnan ku ta lanta kontra nan.

⁸Kuida mi manera pret'i wowo, skonde mi den sombra di bo alanan

⁹p'e pekadónan ku ta kla pa ataká mi, mi enemigunan mortal ku ta changa mi.

¹⁰Nan kurason a bira duru, sin heful, kos insolente ta loke nan ta papia.

¹¹Nan ta sigui mi, ya nan ta rondoná mi, ta buska un chèns pa tira mi abou.

¹²Nan parse leon yen di gana di sker, un yu di leon ku ta lur den skondí.

¹³Lanta, SEÑOR! Enfrentá nan, tumba nan! Usa bo spada i libra mi di e malbadonan.

¹⁴Laga bo man, SEÑOR, libra mi di e hendenan, di nan ku tin kiko ku nan ke den nan bida: yena nan stoma numa fo'i bo provishon,[16] laga nan yu hòmbernan sinti nan yen i asta duna nan yunan loke sobra.

¹⁵Ma ami, hende hustu, lo mira bo Kara i lo ta yen di bo presensia, ora mi spièrta.