Read Papiamento Salmo 18 Bible Online

Salmo 18 - Papiamento bible

Salmo 18

¹Pa maestro di kanto. Di e sirbidó di SEÑOR, David, ku a komponé e kanto akí pa SEÑOR, ora esaki a libr'é for di gara di tur su enemigunan i for di man di Saul. El a bisa asin'akí: O, mi stima Bo, SEÑOR, mi fortalesa!

²SEÑOR ta mi baranka, mi fòrti; mi salbador, esei ta mi Dios, mi baranka pa mi skonde, mi eskudo, mi defensa i salbashon, mi baluarte!

³Gloria na SEÑOR! Ora mi a yam'É, El a libra mi for di man di enemigu.

⁴Lasonan di morto tabatin mi mará, roinan di awa brutu a pasa riba mi,

⁵reino di morto a sera mi den kordon, Lamuèrtè ku su stròp a bin para mi dilanti.

⁶Den mi ansha mi a sklama na SEÑOR, sí, mi a grita duru na mi Dios. El a skucha mi stèm fo'i su palasio selestial, mi gritu di ousilio a yega na su orea.

⁷Kaba tera a sakudí i a kuminsá krak, fundeshi di serunan a tambaliá, nan a tembla pasobra El a baha su rabia.

⁸Fo'i su nanishi a sali huma bai ariba, un kandela golos a brota fo'i su boka, El a saka karbon sendé kòrá kòrá.

⁹El a sker shelu habri i a baha abou, un nubia pretu tabatin bou di su plant'i pia.

¹⁰El a subi un kerubin i a bula bai, E tabata flota riba alanan di bientu.

¹¹El a lora su mes den un mantel di tiniebla, awanan skur, monton di nubia a forma su tènt.

¹²Nubianan a kore pa e fulgor su dilanti, pipitanan di eis i karbonnan sendé.

¹³Bos di SEÑOR tabata lora na shelu, Dios Altísimo a laga su stèm resoná.[17]

¹⁴El a tira su flechanan i plama mi enemigunan, El a tolondrá nan ku rayo di kandela.

¹⁵Hende por a mira fondo di laman, fundeshi di tera a sali na bista pa bo gritu di menasa, SEÑOR, pa suplamentu pisá fo'i bo nanishi.

¹⁶El a saka su man for di ariba gara mi El a saka mi for di e awanan hundu,

¹⁷libra mi for di man di mi enemigu poderoso, di esnan ku ta odia mi i ta muchu fuerte pa mi.

¹⁸Nan a ataká mi na e momento fatal, pero SEÑOR a duna mi su apoyo.

¹⁹El a hiba mi kunÉ na un lugá espasioso, El a libra mi pa motibu ku E tabata stima mi.

²⁰SEÑOR a trata mi segun mi bon kondukta, El a rekompensá mi pa mi mannan limpi,

²¹pasobra mi a sigui SEÑOR su kamindanan i mi no a peka bira lomba pa Dios.

²²Tur su dekretonan m'a tene mi dilanti, nunka mi no a rechasá su mandamentunan.

²³Mi tabata fiel n'E den delaster un kos, m'a tene mi leu fo'i tur loke ta malu.

²⁴Anto SEÑOR a paga mi segun mi bon kondukta pasobra El a mira mi mannan limpi.

²⁵Bo ta fiel pa esun ku ta fiel sin reproche pa un hende ireprochabel,

²⁶sinsero pa esun ku ta sinsero, ma alerta pa un hende astuto.

²⁷Bèrdat, Bo ta salba e pueblo flihí, ma ta pone orguyosonan baha nan bista.

²⁸SEÑOR, bèrdat, Bo ta sende mi lampi, mi Dios ta kambia skuridat pa mi na lus.

²⁹Sí, ku Bo mi ta bula drenta un trupa armá, huntu ku mi Dios mi ta bula muraya.

³⁰E Dios akí — su kaminda ta perfekto, palabra di SEÑOR ta puru, sin meskla; E ta un eskudo pa tur hende ku ta buska nan refugio serka djE.

³¹Pasobra ken ta Dios fuera di SEÑOR? Ki baranka tin fuera di nos Dios?

³²E Dios ku ta faha mi sintura ku forsa i ku ta perkurá pa mi kaminda ta lizu;

³³ku ta hasi mi pia manera di biná i ta pone mi para firme na lugánan den altu;

³⁴ku ta siña mi mannan e arte di bataya i mi brasa kon rèk e bog di mas pisá.

³⁵Bo a entregá mi bo eskudo protektor, bo man drechi a tene mi pará riba pia, bo kuido a pone ku mi forsa a oumentá.

³⁶B'a laga mi kana ku pasonan grandi mi kokot'i pianan no a bira débil.

³⁷M'a persiguí mi enemigu, koh'é na kaminda i mi no a bolbe sin a kaba kuné.

³⁸Esnan ku mi a bati no por lanta mas, nan a kai abou, drumí na mi pia.

³⁹Sí, Bo a faha mi ku forsa pa kombate, Bo a laga mi atversario basha abou mi dilanti.

⁴⁰Bo a pone mi enemigu bira lomba, hui bai; mi a destruí tur esnan ku ta odia mi.

⁴¹Nan a grita ousilio — ningun hende pa salba, nan a sklama na SEÑOR — E no a kontestá.

⁴²Mi a garna nan fini, stòf lantá pa bientu, mi a bari nan manera sushi di kaya.

⁴³Bo a libra mi di un pueblo rebelde, Bo a hasi mi kabes di nashonnan, pueblonan deskonosí ta sirbi mi;

⁴⁴nan ta obedesé mi pareu nan tende mi. Nan ta trastia mi, e strañeronan ei,

⁴⁵e strañeronan ta pèrdè kurashi, ta sali fo'i nan fòrtinan tur na temblamentu.

⁴⁶Biba SEÑOR! Bendishoná ta mi Baranka, altu elevá ta e Dios ku a salba mi;

⁴⁷e Dios kende a pèrmití pa mi venga mi i ku a pone pueblonan bou di mi poder,

⁴⁸E ku a salba mi di enemigunan furioso, ku a hisa mi altu riba esnan ku a ataká mi i a libra mi di hende violento.

⁴⁹P'esei, mi ta alabá Bo, SEÑOR, den nashonnan, mi ta kanta salmo na honor di bo nòmber.

⁵⁰Bo a duna bo rei un viktoria grandi, Bo a mustra bo fieldat na bo rei ungí, na David i su famia te den tur eternidat.