Read Papiamento Salmo 2 Bible Online

Salmo 2 - Papiamento bible

Salmo 2

¹Di kon nashonnan ta rebelde i pueblonan ta kònkel sin motibu?

²Reinan di mundu ta lanta, gobernantenan ta sera kòmplòt kontra SEÑOR i Esun Ungí:

³‘Laga nos ban kibra nan kadenanan, ban libra nos kurpa di nan frenanan!’

⁴Riba su trono den shelu Dios ta hari, sí, Señor ta hasi mofa di nan!

⁵Kaba E ta papia ku nan den su rabia, ta yena nan ku sustu den su furia:

⁶‘T'Ami a nombra mi rei riba Sion, mi seru sagrado.’

⁷Mi ke papia dje dekreto di SEÑOR. E di ku mi: ‘Bo ta mi yu; awe M'a duna bo bida.

⁸Pidi Mi numa i lo Mi duna bo nashonnan pa bo manda riba dje, delaster un skina di mundu lo ta di bo.

⁹Bo por plèchè nan ku bara di heru, bo por garna nan manera un poron.’

¹⁰P'esei, reinan, usa kabes, pensa bon, gobernantenan di mundu!

¹¹Sirbi SEÑOR ku temor, tembla i sunchi su pia,[1] p'E no rabia i boso muri na kaminda, pasobra E ta rabia lihé! Felis t'esnan ku ta konfia den djE!