Read Papiamento Salmo 21 Bible Online

Salmo 21 - Papiamento bible

Salmo 21

¹Pa maestro di kanto. Salmo di David. SEÑOR, bo poder ta yena rei ku alegria, kon kontentu e ta ku e viktoria ku B'a duna!

²Bo a kumpli k'e deseo hundu den su kurason, Bo no a neng'é loke su boka a pidi.

³Bo a akoh'é ku bendishonnan presioso, Bo a bistié korona di oro puru.

⁴Ta bida el a pidi: ata B'a dun'é, un bida largu, un bida duradero!

⁵Su realse ta grandi ya ku Bo a proteg'é, Bo a bistié ku dignidat i splendor;

⁶komo Bo a konsed'é bo bendishon pa tur tempu, bo presensia ta yena su alma ku alegria.

⁷Pasobra rei ta pone su konfiansa den SEÑOR, pa bondat di Dios Altísimo e no ta tambaliá.

⁸Mare bo man por bati tur bo enemigunan, mare bo man drechi dal tur ku ta odia bo!

⁹Pega nan na kandela manera un fòrnu, dia ku bo reis riba nan. SEÑOR lo devorá nan den su furia, kandela lo kome nan tur.

¹⁰Pone tur nan yunan disparsé fo'i riba mundu, tur nan desendientenan fo'i entre hende.

¹¹Maske nan ta plania pa hasi bo un kos malu, maske nan ta kònkel kontra bo, nan lo no logra,

¹²pasobra bo ta pone nan bira, hui bai, bo ta arma bo bog, kla pa tira riba nan.

¹³Lanta ariba, SEÑOR, ku bo forsa! Nos lo kanta i selebrá bo poder!