Read Papiamento Salmo 22 Bible Online

Salmo 22 - Papiamento bible

Salmo 22

¹Pa maestro di kanto. Na weis di ‘Biná di ourora’. Un salmo di David. Mi Dios, mi Dios, di kon B'a bandoná mi, asina leu fo'i mi en bes di bin salba mi, leu di mi palabra i kehonan?

²Mi Dios, den dia mi ta yama, pero Bo no ta kontestá; anochi tambe, ma Bo no tin atenshon.

³Tòg Bo tin bo bibá den santuario, kaminda Israel ta alabá Bo![20]

⁴Ta den Bo nos grandinan a konfia, nan a konfia i Bo a salba nan.

⁵Ta na Bo nan a sklama i nan a skapa, nan a buta nan konfiansa den Bo sin ku nan a keda brongosá.

⁶Ma ami ta un bichi, no un hende, mofa di hende, despresio di pueblo.

⁷Tur esnan ku ta mira mi ta hari mi, ta hari falsu, sakudiendo nan kabes:

⁸‘El a konfia[21] den SEÑOR, lag'É salb'é! Laga Dios libr'é! E n' ta stim'é?’

⁹For di barika di mi mama Bo a fangu mi, pone mi trankil na su pechu;

¹⁰for di su seno mi a pasa den bo man, Bo ta Dios fo'i barika di mi mama.

¹¹No keda leu fo'i mi, peliger ta serka i mi no tin hende pa yuda mi!

¹²Kantidat di toro a rondoná mi, tur rònt tin toro di manzinga di Bashan.

¹³Nan a span nan boka grandi kontra mi — leonnan feros, gritando duru.

¹⁴Mi bida a kore bai manera awa, tur mi wesunan a kita fo'i lugá, dirtí paden di mi mondongo.

¹⁵Mi shel'i boka[22] ta seku seku manera wea di klei garná; mi lenga ta pegá den mi boka, Bo a pone mi sosegá den stòf di morto.

¹⁶Kachónan a bin rondoná mi, un trupa di malbado a changa mi. Nan a bora mi man[23] i mi pianan,

¹⁷mi por konta tur wesu di mi kurpa, nan ta bin mira mi, para wak mi.

¹⁸Nan a parti mi paña entre nan i ta tira dou pa mi mantel.

¹⁹Ma Abo, SEÑOR, no keda leu! Mi fortalesa, kore bin yuda mi!

²⁰Warda mi bida, loke sobra di mi for di spada, for di gara dje kachónan;

²¹salba mi for di boka di leon, ami, pober,[24] for di kachunan di búfalo.

²²Lo mi konta mi rumannan di bo nòmber i alabá Bo den presensia di nan tur.

²³Boso, fielnan di SEÑOR, alab'É, dun'É honor, tur desendiente di Yakob, respet'É, henter pueblo di Israel!

²⁴Ya ku E no a despresiá ni detestá un hende mizerabel den apuro, E no a kita kara for di dje, ma a skuch'é ora el a grita ousilio.

²⁵T'Abo ta pone mi alabá Bo den presensia di bo pueblo numeroso; lo mi kumpli ku tur mi promesanan dilanti di esnan ku ta tem'É.

²⁶Un dia pobernan lo kome te yena, esnan ku buska SEÑOR lo alab'É; nan[25] kurason sea pa semper kontentu!

²⁷Na delaster un skina di mundu hende lo kòrda i kombertí na SEÑOR; tur famia di pueblonan pagano lo kai abou Su dilanti ador'É.

²⁸Pasobra SEÑOR ta Rei, E ta goberná nashonnan.

²⁹Sí, poderosonan di mundu lo kai abou Su dilanti ador'É;[26] tambe lo dobla Su dilanti esnan ku a baha den tera, ku no tin forsa mas pa sigui biba.

³⁰Nan desendensia lo sirbiÉ i lo papia di Señor ku nan yunan;

³¹nan lo bin konta di su obranan hustu na esnan ku lo nase despues. Komo pa medio di djE tur kos ta kumplí.