Read Papiamento Salmo 24 Bible Online

Salmo 24 - Papiamento bible

Salmo 24

¹Salmo di David. Henter mundu ta di Dios ku tur loke ta den dje, tera ku tur hende ku ta biba riba dje.

²T'É a sigur'é den korientenan di awa.

³Ken lo por subi seru di SEÑOR?[27] Ken lo keda na e lugá sagrado?

⁴Esun ku ta limpi den su obra i pensamentu, esun ku no ta loko tra'i fandanganan di mundu[28] i ku no sa hura falsu tampoko.

⁵Bendishon di SEÑOR ta pa un hende asina, Dios, su Salbador, lo dun'é su derecho.

⁶Sorto di hendenan asina ta buska SEÑOR, ta buska bo Kara, o Dios di Yakob![29]

⁷O portanan, hisa kabes; alsa boso, portalnan antiguo, pa Rei di gloria por drenta.

⁸Ta ken e Rei di gloria ta? Ta SEÑOR, Esun fuerte i balente, SEÑOR, triunfante den bataya!

⁹O portanan, hisa kabes; alsa boso, portalnan antiguo, pa Rei di gloria por drenta.

¹⁰Ta ken e Rei di gloria ta? Esei ta SEÑOR di universo. T'É ta Rei di gloria!