Read Papiamento Salmo 25 Bible Online

Salmo 25 - Papiamento bible

Salmo 25

¹Di David. Na Bo, SEÑOR, mi ta alsa mi alma,

²mi Dios, mi ta konfia den Bo; no pone mi kara na bèrgwensa, no duna mi enemigunan gustu.

³Di esnan ku ta spera den Bo ningun lo no keda brongosá; esnan ku no tin kunes pa kibra ku Bo ta nan so lo keda ku bèrgwensa.

⁴Mustra mi bo kamindanan, SEÑOR, e direkshon ku Bo ke pa mi kohe.

⁵Guia mi pasonan segun bo bèrdat, siña mi: Abo ta mi Dios i Salbador; henter dia mi ta spera Bo.

⁶Kòrda bo ternura, SEÑOR, i bo bondat, komo nan ta eterno.

⁷No keda kòrda e piká- i fayonan di tempu mi tabata hóben, sino kòrda riba mi, SEÑOR, den bo gran amor i bondat.

⁸SEÑOR ta bondadoso i hustu, E ta mustra pekadónan kaminda.

⁹E ta siña sensíonan i humildenan kon sigui kaminda di birtut.

¹⁰Tur kaminda di SEÑOR ta resultá grasia i bèrdat pa esnan ku ta fiel na su aliansa i dekretonan.

¹¹Fiel na bo nòmber, SEÑOR, pordoná mi mi kulpa, e ta grandi.

¹²No tin hende ku rèspèt pa SEÑOR ku E no ta mustra unda sigui.

¹³E mes lo biba felis i e pais lo keda pa su yunan.

¹⁴SEÑOR ta íntimo ku es ku respet'É, E ta siñ'é konosé su aliansa.

¹⁵Semper mi bista ta fihá riba SEÑOR, E ta lòs mi pianan fo'i trampa.

¹⁶Mira mi, SEÑOR, kai na mi pena, pasobra mi ta so i mizerabel.

¹⁷Mi kurason ta ansha mas i mas, mi penanan — libra mi di nan!

¹⁸Mira mi tormento, mi apuro, i kita tur mi pikánan fo'i mi.

¹⁹Mira kuantu enemigu mi tin, ku kuantu odio kruel nan ta odia mi!

²⁰Warda mi bida, salba mi, no brongosá mi! Bo n' ta mi refugio?

²¹Ku rektitut i honrades warda mi, komo m'a pone mi konfiansa den Bo.

²²Libra Israel, o Dios, di tur su ansha!