Read Papiamento Salmo 31 Bible Online

Salmo 31 - Papiamento bible

Salmo 31

¹Pa maestro di kanto. Salmo di David. Den Bo, SEÑOR, mi ta buska mi refugio, no laga mi keda nunka brongosá. Bo ta hustu, p'esei bin salba mi!

²Tende mi, no tarda pa libra mi, sea mi baranka di refugio, un fòrti fuerte pa duna mi skapatorio.

³Bo ta mi baranka, mi fòrti; pasobra Bo ta fiel na bo nòmber lo Bo guia mi i pone mi sosegá.

⁴Abo por saka mi for di e trampa ku ketu ketu nan a arma pa kohe mi: no t'Abo ta Esun ku ta mi forsa?

⁵Den bo man mi ta entregá mi spiritu: Bo ta salba mi, SEÑOR, Dios di bèrdat!

⁶Mi ta detestá tur e hendenan ku ta sirbi diosnan falsu i bashí; ami mes ta stèns riba SEÑOR.

⁷Bo bondat ta mi goso i alegria, pasobra Bo a mira mi mizeria i Bo a hasi kaso di mi pena.

⁸Bo no a entregá mi na enemigu, Bo a duna mi espasio pa mi move.

⁹SEÑOR, piedat! Mi ta den pèrtá, mi wowo ta suak di fèrdrit, mi alma, mi kurpa meskos.

¹⁰Mi bida ta pasa den pena, mi añanan ta bai na kehamentu; den mi mizeria[34] mi a pèrdè tur forsa, mi ta kansá te den mi wesu.

¹¹M'a bira mofa di tur mi enemigunan, pa mi bisiñanan pió; mi ta un spantu pa amigunan di kas, ken ku mira mi riba kaya ta hui mi,

¹²lubidá, fo'i kurason, manera un morto, un pida wèrki, tirá afó.

¹³Mi por tende hende kuchikuchi, tur kaminda tin teror; nan ta traha kòmplòt kontra mi, un plan pa kita mi bida.

¹⁴Ma mi ta konfia riba Bo, SEÑOR, mi ta bisa: ‘Abo ta mi Dios!’

¹⁵Ta den bo man mi suerte ta, libra mi di e enemigunan ku ta persiguí mi.

¹⁶Laga bo Kara iluminá bo sirbidó, salba mi pa motibu di bo amor.

¹⁷SEÑOR, t'Abo mi ta yama, no laga mi kara na bèrgwensa: enkambio brongosá e pekadónan, tapa nan boka den reino di morto.

¹⁸Laga boka mentiroso keda ketu, e ta papia insolensia ku un bon hende, yen di pretenshon i bofon.

¹⁹Esta abundante e bondat ta, ku Bo ta warda pa esnan ku respetá Bo, e bondat ku Bo ta prepará den bista di henter humanidat, pa esnan ku ta skonde serka Bo.

²⁰Bo ta warda nan, skondí serka Bo, leu di intriganan di hende; Bo ta protegé nan den bo tènt kontra lenganan pleitista.

²¹Bendishoná sea SEÑOR ku a mustra mi su bondat na un manera milagroso, komo si fuera mi tabata biba den un stat, fortifiká ku muraya.

²²Mi mes tabata pensa den mi ansha: ‘B'a tira mi leu fo'i bo bista’, pero Bo a tende mi súplika, ora m'a grita pidi Bo ousilio.

²³Stima SEÑOR, boso, su amigunan; SEÑOR ta warda esnan ku ta fiel n'E, ma esnan ku ta aktua sobèrbè E ta laga nan haña nan pago!

²⁴Tuma kurashi, sin temor den kurason, boso tur ku ta spera den SEÑOR!