Read Papiamento Salmo 33 Bible Online

Salmo 33 - Papiamento bible

Salmo 33

¹Grita kontentu pa SEÑOR, tur su fielnan, kanta su gloria ta pas pa tur bon hende.

²Kanta su alabansa ku siter, kanta p'E ku arpa di dies kuèrdè.

³Kanta un kantika nobo p'E, laga kuèrdènan zona, alsa bos!

⁴Palabra di SEÑOR ta drechi, bo por stèns riba loke E ta hasi.

⁵E ta gusta hustisia i derecho, henter mundu ta yen di su amor.

⁶Palabra di SEÑOR a krea shelu, rosea di su boka tur su streanan.

⁷E ta warda lamannan den dam i a sera nan fondo den bodega.

⁸Tera henter, teme SEÑOR, tur habitante di mundu, respet'É!

⁹Ún palabra i ata tur kos, ún òrdu i tur kos tabat'ei.

¹⁰SEÑOR ta bruha propósito di pueblonan, E ta para plannan di nashonnan,

¹¹pero plan di SEÑOR t'ei pa semper, su desishonnan pa tur generashon.

¹²Felis t'e pueblo ku su Dios ta SEÑOR, e nashon skohí pa ta di djE.

¹³SEÑOR ta mira abou for di shelu, ta fiha bista riba kada yu di hende.

¹⁴Fo'i kaminda E ta biba E ta peilu ku atenshon tur habitante di mundu;

¹⁵t'É a forma kurason di tur hende, di kada un E ta sondia su obranan.

¹⁶Ningun rei no ta gana djis pa forsa di su ehérsito, un héroe no ta skapa pa su mes forsa brutu.

¹⁷No konta ku kabai pa bo gana viktoria, su forsa por ta grandi, ma e n' ta salba bo bida.

¹⁸Kòrda ku bista di SEÑOR ta riba esnan ku respet'É i ku ta konfia firmemente den su amor bondadoso;

¹⁹E ta esun ku ta libra nan di morto i ku lo salba nan bida den tempu di flakesa.

²⁰Nos alma ta warda binimentu di SEÑOR, E ta nos yudansa, E ta nos eskudo.

²¹Sí, nos kurason ta kontentu kunÉ, nos ta pone nos konfiansa den su nòmber santu.

²²Bo amor i bondat, SEÑOR, keda riba nos, manera nos konfiansa ta firme den Bo.