Read Papiamento Salmo 34 Bible Online

Salmo 34 - Papiamento bible

Salmo 34

¹ Di David, ora el a fingi dilanti di Abimelèk di a bira di kabes i Abimelèk a kore kuné di moda ku David a skapa. Mi ke alabá SEÑOR tur tempu, su alabansa lo no kita fo'i mi boka.

²Mi alma ta gloria den SEÑOR, laga humildenan bin tende i gosa.

³Kanta grandesa di SEÑOR huntu ku mi, ban alabá su nòmber tur huntu!

⁴M'a akudí na SEÑOR: El a skucha mi, El a libra mi di tur mi temornan.

⁵Esnan ku fiha riba djE lo bria i nan kara lo no keda na bèrgwensa.

⁶Mira, tabatin un hende pober, el a grita i SEÑOR a skuch'é. El a libr'é for di tur su problemanan.

⁷SEÑOR su angel ta tene kampamentu rònt di nan ku sirbi Dios, pa protegé nan.

⁸Purba i mira ki bon SEÑOR ta, felis t'esun ku ta skonde serka djE.

⁹Teme SEÑOR, boso, hende konsagrá n'E, pasobra esnan ku respet'É nan no tin falta di nada.

¹⁰Leonnan yòn ta pasa hamber i trafat, ma esnan ku ta buska SEÑOR no ta falta ningun bendishon.

¹¹Bini, mi yunan, skucha mi: ami ta bai siña boso kon boso mester teme SEÑOR.

¹²Tin hende ku ke biba hopi tempu, ku ke pasa nan dianan den bon?

¹³Anto warda bo lenga di maldat i bo lepnan di papia mentira.

¹⁴Hui kos malu, hasi bon, buska pas, trata di gan'é.

¹⁵Bista di SEÑOR ta riba hustunan, su orea ta atento pa nan gritu.

¹⁶SEÑOR ta mira malechornan ku mal wowo, pa E kita nan rekuerdo fo'i mundu.

¹⁷Nan ta grita i SEÑOR ta kontestá nan i ta libra nan di tur nan problemanan.

¹⁸SEÑOR ta serka esnan ku ta kibrá, E ta salba hende abatí.

¹⁹Un hende hustu ta haña hopi sla, ma SEÑOR ta salb'é di tur esei.

²⁰E ta kuida su wesunan tur, pa ningun di nan no kibra.

²¹Maldat ta trese morto pa malbadonan, ken ku odia hende hustu lo pasa su kastigu.

²²SEÑOR ta salba bida di esnan ku ta sirbiÉ, ken ku skonde serka djE lo no haña kastigu.