Read Papiamento Salmo 35 Bible Online

Salmo 35 - Papiamento bible

Salmo 35

¹Di David. SEÑOR, bringa kontra esnan ku ta bringa mi, ataká mi atakantenan!

²Kohe harnas i eskudo, lanta, bin yuda mi.

³Saka lansa i hacha di guera kontra mi enemigunan. Bisa mi: Mi ta bo Salbador!

⁴Brongosá i humiliá tur esnan ku ke kita mi bida; laga esnan ku ke hasi mi daño hala atras yen di bèrgwensa.

⁵Laga nan ta bagas pa bientu, — SEÑOR su angel nan tras; —

⁶nan kaminda sea skur i lag'é slep, — SEÑOR su angel persiguí nan. —

⁷Sin motibu nan a skonde un buraku bou di nan reda pa mi; nan a kob'é pa kohe mi bida sin ningun motibu.

⁸Laga desaster sorprendé nan kada un na un ora inesperá; laga e reda skondí kohe nan i nan mes kai den buraku.

⁹Anto lo mi ta kontentu ku SEÑOR i lo mi gosa su yudansa.

¹⁰Di henter mi alma lo mi bisa: ‘SEÑOR, ken ta manera Bo? Abo ku ta libra un hende débil di unu mas fuerte kuné, un hende den mesté i un pober di esnan ku ta eksplotá nan.’

¹¹Testigunan falsu a lanta puntrando kos ku mi no sa;

¹²nan a tuma bon hasi malu, nan a laga mi sin amparo.

¹³Ami enkambio, ora nan tabata malu, m'a tuma un saku pa bistí; mi a mortifiká mi ku ayuno, m'a resa kada be di nobo.

¹⁴Komo si fuera pa un amigu o ruman mi tabata kana tristu; manera na luto pa un mama mi a baha kabes.

¹⁵Ma ora mi a trompeká, nan a gosa i nan a kore bini huntu, bini huntu pa dal mi di gòlpi, nan no a kansa di sara mi;

¹⁶nan a tèr mi hasi chèrchè di mi,[36] a kou djente kontra mi.

¹⁷Kuantu tempu mas, Señor, Bo ta djis para mira? Salba mi bida, loke sobra di mi, di furia feros dje leonnan;

¹⁸lo mi gaba Bo den gran asamblea, i alabá Bo dilant'i multitut.

¹⁹No laga mi enemigunan falsu tuma gustu riba mi, ni esnan ku ta odia mi sin motibu kinipí wowo ku otro.

²⁰Nan no ta papia asuntunan di pas; nan plannan traishonero ta kontra hendenan ketu den pais.

²¹Nan ta alsa bos kontra mi i ta bisa: ‘Esta nò! Nos mes wowo a mira awor!’

²²T'Abo a mira, SEÑOR, no keda ketu, no keda leu fo'i mi, Señor!

²³Lanta pa mi haña mi derecho, Señor mi Dios, pleita mi kaso.

²⁴Abo husga mi segun bo hustisia, o SEÑOR, mi Dios, pa nan no tuma gustu riba mi.

²⁵No laga nan pensa den nan mes: ‘Esta bon! Nos a logra!’ i no bisa: ‘Ata nos a gulié!’

²⁶Laga esnan ku ta gosa mi desgrasia haña bèrgwensa i bira blek; mare esnan ku a alsa bos kontra mi keda tapá ku bèrgwensa i konfushon.

²⁷Ma mare esnan ku ke mira mi viktoria grita di alegria i ta kontentu, bisando kada be: ‘SEÑOR ta grandi! E ke pa tin pas pa su sirbiente.’

²⁸Lo mi n' tin boka pa kanta bo hustisia i pa alabá Bo henter dia.