Read Papiamento Salmo 37 Bible Online

Salmo 37 - Papiamento bible

Salmo 37

¹Di David. No kunsumí ku pekadónan, no kudishá malechornan!

²Nan ta seka lihé manera yerba, ta marchitá manera beu di kunuku,

³Konfia den SEÑOR, hasi bon, habitá tera i keda fiel.

⁴Buska bo goso den SEÑOR i l'E duna bo tur loke bo kurason por deseá.

⁵Pone bo bida den man di SEÑOR, konfia den djE: lo E aktua.

⁶Lo E pone bo hustisia bria manera dia kla i bo derecho manera lus di mèrdia.

⁷Warda trankil loke SEÑOR lo hasi, sigui sper'É: E ta yuda. No kunsumí ku un hende ku tin éksito, e hòmber ku ta traha ku intriga.

⁸Stòp di rabia, laga tur furia, no kunsumí, esei ta daña tur asuntu.

⁹Pasobra Dios lo eksterminá malechornan, ma esnan ku konfia den SEÑOR, ta nan lo poseé e Tera.

¹⁰Un ratu i malbado a kaba, no buska su sitio, e n' t'ei mas.

¹¹Enkambio, hende humilde lo bira doño di e Tera pa semper i lo gosa di un pas kompleto.

¹²Pekadó ta konspirá kontra hustu, e ta kou djente kontra nan.

¹³Ma Señor ta harié pasobra E sa, ku su ora ta serka di yega.

¹⁴Pekadónan a saka nan spada, ya nan a span nan bog pa tumba hende pober i humilde, pa mata tur hende birtuoso.

¹⁵Pero nan spada lo bora nan mes kurason i nan bognan lo kibra na wèrki.

¹⁶E poko ku bon hende tin bal mas ku e rikesa enorme di mal hende.

¹⁷Pasobra Dios lo kibra brasa di malbadonan, ma SEÑOR lo sostené hende hustu.

¹⁸SEÑOR ta kuida bida di bon hende, e Tera ku nan a heredá lo keda di nan pa semper;

¹⁹den mal tempu nan lo no ta konfundí, den mizeria di hamber nan lo tin basta.

²⁰Ma pekadónan sí lo peresé, SEÑOR su enemigunan lo keda manera bunitesa di kunuku: ta bai nan ta bai na huma.

²¹Pekadó ta fia plaka di hende, pero e no ta duna bèk; hende hustu tin heful i ta man lòs.

²²Esnan bendishoná pa SEÑOR ta nan lo poseé e Tera; esnan maldishoná pa SEÑOR, lo E kaba ku nan kompletamente.

²³SEÑOR ta guia un hende su pasonan, ora E gusta su kondukta.

²⁴Si akaso e trompeká, e no ta kai, SEÑOR ta ten'é na su man.

²⁵Mi ta'ta mucha i awor mi ta bieu, ma mi no a mira nunka di mi bida ku un hende hustu a keda bandoná, ni ku su yunan mester kana pidi pan;

²⁶tur ora e tin pena di otronan, ta para kla pa fia hende plaka: su desendensia lo haña bendishon.

²⁷Evitá maldat, hasi bon, lo bo no falta un lugá pa bo biba;

²⁸SEÑOR ta defendé derecho i lo no bandoná su fielnan. SEÑOR ta warda nan pa semper, ma E ta kaba ku rasa di mal hende.

²⁹Hende hustu lo poseé e Tera i lo biba pa semper den dje.

³⁰For di boka di un hende bondadoso ta sali palabranan sabí, su lenga ta papia kos drechi.

³¹E ta karga Lei di Dios den kurason, su pasonan lo no tambaliá.

³²Pekadó ta wak un hende hustu i ta buska moda di mat'é.

³³SEÑOR no ta entreg'é den su man, E no ke pa akus'é ni konden'é.

³⁴Konfia SEÑOR i sigui su kaminda, anto lo E duna bo honor i lo hasi bo doño di e Tera; lo bo mira malechornan destruí.

³⁵Mi a mira un pekadó, un tirano, bon plantá manera un palu ku a bona.

³⁶Despues m'a[38] pasa — el a bai, m'a busk'é — mi no por a hañ'é mas.

³⁷Wak hende hustu, opservá hende drechi: hende di pas tin porvenir.

³⁸Ma kriminalnan lo ta tur destruí, rasa di malbadonan lo kaba.

³⁹SEÑOR ta Esun ku ta salba hende hustu, E ta nan fòrti den tempu difísil.

⁴⁰SEÑOR ta yuda nan pa nan skapa, ta libra nan di pekadónan, salba nan, pasobra serka djE ta nan refugio.