Read Papiamento Salmo 39 Bible Online

Salmo 39 - Papiamento bible

Salmo 39

¹Pa maestro di kanto. Pa Yedutun. Salmo di David. Mi di: Laga mi warda mi kurpa pa mi no hasi piká ku mi lenga; mi ke bisti mi boka un bosal, tanten ku tin malbado mi dilanti.

²Mi a keda ketu, resigná, mi a wanta mas ku ta'ta bon, ma mi doló a bira mas pisá.

³Mi kurason tabata kima den mi pechu, ku m'a pensa un kos — kandela; te ku mi lenga a lòs i m'a bisa:

⁴‘SEÑOR, laga mi sa mi fin, kuantu dia mas mi tin di bida; laga mi sa kon pasahero mi ta.

⁵Esta kòrtiku Bo a hasi mi dianan, mi bida no ta nada den bo bista, hende bibu no ta mas ku un rosea;

⁶hende ta pasa manera un sombra, tur su anshamentu ta pòrnada; e ta montoná semper mas tantu, pero e no sa ta pa ken.

⁷Señor, kiko mi spera awor? Ta den Bo mi a pone mi speransa.

⁸Libra mi di tur mi pikánan, no laga un loko tuma mi hasi kèns.

⁹Mi ta ketu, mi n' ta habri mi boka, n' ta bo man a hasi tur esei?

¹⁰Kita bo kastigu fo'i mi, mi ta rendí pa gòlpi di bo man.

¹¹Kastigando kulpa di hende Bo ta dun'é skremènt; manera mòt Bo ta kome su ilushon; hende no ta mas ku un rosea.

¹²SEÑOR, skucha mi orashon, hasi kaso di mi gritu di ousilio; no keda surdu pa mi kehonan. Mi no ta un wéspet serka Bo? Ta serka Bo mi ta biba, manera ántes ayá tur mi grandinan.

¹³Kita bo bista severo fo'i mi, laga mi bolbe hala rosea promé ku mi bai i lo n' t'ei mas.’