Read Papiamento Salmo 44 Bible Online

Salmo 44 - Papiamento bible

Salmo 44

¹Pa maestro di kanto. Di yunan di Korag. Un poema didáktiko. O Dios, ku nos mes orea nos a tende, nos antepasadonan a konta nos di dje: di loke Bo a laga sosodé den nan dianan, ten di nan ten, ku bo propio man.

²Pa por a planta nán Bo a plama paganonan i pa laga nan krese Bo a plèchè nashonnan.

³Pasobra no ta pa nan spada nan a haña e tera, no ta nan brasa a duna nan viktoria, sino bo man drechi, bo brasa, bo presensia radiante, pasobra nan a kai na bo grasia.

⁴Abo, mi Rei i mi Dios, Bo ta Esun ku ta pone[39] Yakob gana viktoria;

⁵ku bo yudansa nos ta tumba esnan ku ataká nos, den bo nòmber nos ta trapa esnan ku proboká nos.

⁶Pasobra mi konfiansa no ta den mi flechanan, no ta mi spada ta trese mi viktoria;

⁷Abo so a libra nos fo'i nos enemigunan, Abo a brongosá esnan ku ke nos malu.

⁸Nos a duna gloria na Dios tur ora bai i nos ke alabá bo nòmber sin fin.

⁹Ma awor B'a rechasá nos, pone nos na bèrgwensa, Bo no ta sali mas na kabes di nos trupanan.

¹⁰Bo a laga nos hui dilanti dje enemigunan, nos atversarionan a hasi sakeo na nan smak.

¹¹B'a entregá nos pa mata manera karné i a plama nos meimei di pueblonan pagano.

¹²Bo a bende bo pueblo na preis di ganga, e ganashi no a rende muchu pa Bo.

¹³Bo a hasi nos bira bofon di nos bisiñanan, bochorno i insulto di tur hende rònt di nos.

¹⁴Bo ta pone nos na boka di pueblonan pagano, Bo ta pone nashonnan traha kara pa nos.

¹⁵Henter dia mi tin mi deshonor mi dilanti, mi por tapa mi kara di bèrgwensa

¹⁶ora mi tende nan ta chèrchè i insultá mi i mi mira nan mirada di odio i vengansa.

¹⁷Tur e kosnan ei ta pasa nos i sinembargo nos no a lubidá Bo ni a kibra bo Aliansa.

¹⁸Nos no a pensa nunka di bai bira lomba pa Bo, nos pia no a kita for di bo kaminda.

¹⁹Tòg Bo a garna nos meimei di chakalnan i Bo a laga nos atras den skuridat di mas teribel.

²⁰Si akaso nos por a lubidá SEÑOR su nòmber i por a hisa nos man na un otro dios,

²¹akaso Dios lo no a ripará esei? E no sa sekretonan skondí den kurason?

²²Pa bo kousa nan ta mata nos tur dia bai i nan ta trata nos manera karné pa mata.

²³Spièrta, Señor! Pakiko Bo ta drumi? Lanta! No rechasá nos pa semper!

²⁴Pakiko Bo ta skonde bo Kara pa nos, pakiko lubidá nos mizeria i opreshon?

²⁵Nos kurason a kai, at'é den stòf, nos kurpa ta pega den tera.

²⁶Lanta! Bin yuda nos, salba nos pa motibu di bo amor!