Read Papiamento Salmo 45 Bible Online

Salmo 45 - Papiamento bible

Salmo 45

¹Pa maestro di kanto. Na weis di ‘lelinan’. Di yunan di Korag. Un poema didáktiko. Kansion di amor. Mi kurason ta vibra di palabranan bunita, mi ta resitá mi poesia pa rei, mi lenga parse pèn di un bon eskritor.

²Bo ta mas bunita ku tur yu di mama, palabranan grasioso ta brota fo'i bo boka: t'asina Dios su bendishon ta ku bo pa semper.

³Faha bo spada, o héroe, mar'é na bo sintura, tur na gala i splendor; sali bai bringa viktorioso pa kousa di bèrdat i hustisia klemente. Arma bo bog, bo man drechi hasi kosnan spantoso.

⁵Bo flechanan ta skèrpi i, ku nashonnan na bo pia, nan lo bora kurason di enemigunan di rei.

⁶Bo trono, manera di Dios, t'ei pa semper, bo sèpter real ta un sèpter di hustisia.

⁷Bo ta stima hustisia i ta odia maldat. P'esei Dios, bo Dios, a konsagrá bo ku zeta, señal di alegria, mas ku tur bo kompañeronan.

⁸Bo bistínan ta fragante di áloe, mira i kasia; muzik di kuèrdè ta kontra bo fo'i palasio di ivor.

⁹Denter di damanan di korte tin prinsesa, na bo man drechi bo esposa, dòrná ku oro di Ofir.

¹⁰Skucha, mi yu, mira akí, paga tinu: no kòrda mas riba bo pueblo i kas di bo tata.

¹¹Awor laga bo beyesa lanta amor di rei, E ta bo señor! Dun'é homenahe!

¹²Siudat di Tiro lo bini[40] ku regalo, esnan mas riku di pueblo lo ke gana bo fabor.

¹³Ainda den su kamber e prinsesa ta lusi, su bistí ta hilá di brokat di oro.

¹⁴Den bistí multikoló nan ta hib'é serka rei; siguí pa damanan di honor, su amiganan, tur ta eskoltá te serka bo. Bou di gritu di entusiasmo, ku gran legria, nan ta drenta den palasio di rei.

¹⁶Bo yunan, o rei, lo tuma e puesto di bo grandinan. Lo bo nombra nan prínsipe den henter e pais.

¹⁷Mi ke plama bo fama serka tur generashon, pa nashonnan alabá Bo pa tur eternidat.