Read Papiamento Salmo 50 Bible Online

Salmo 50 - Papiamento bible

Salmo 50

¹Salmo di Asaf. Dios di diosnan, SEÑOR, ta papia, ta yama mundu for di ost te wèst.

²Dios ta resplandesé for di Sion, e siudat di perfekto bunitesa.

³Nos Dios ta bini, lo E no keda ketu; dilant'i djE tin un kandela golos, rònt di djE un tempestat violento.

⁴E ta grita bisa shelu ayariba i tera, pa nan husga su pueblo:

⁵‘Trese tur mi fielnan huntu pa Mi, nan ku a sera e Aliansa ku Mi, ofresiendo sakrifisionan na Mi.’

⁶Shelu ta anunsiá ku E ta hustu, ku Dios, E mes, ta bin husga.

⁷‘Skucha, mi pueblo, pa Mi papia ku bo i testiguá kontra bo, Israel! Ta Dios, bo Dios, Mi ta!

⁸Mi no ta kritiká bo sakrifisionan, pasobra Bo ta presentá Mi tur dia bo animalnan, kimá riba altá.

⁹Ma Mi no ke ningun toro fo'i bo stal, ni chubatu for di bo kurá,

¹⁰komo tur bestia di mondi ta di Mi, e míles di animalnan den mi serunan.

¹¹Mi konosé kada para den laria,[47] loke ta move den kunuku ta di Mi.

¹²Si akaso Mi tabatin hamber, sigur lo Mi no a bisa bo, pasobra Ami ta doño di tera i di tur loke tin riba dje.

¹³Ami kome karni di toro? Ami bebe sanger di chubatu?

¹⁴Laga alabansa ta bo ofrenda na Dios. Si bo a hasi un promesa na Altísimo, mira pa bo kumpli kuné.

¹⁵Si e ora ei bo yama Mi den apuro, lo Mi libra bo i abo lo honra Mi.’

¹⁶Ma Dios ta bisa pekadó asin'akí: ‘Ki mishi bo resitá mi mandamentunan i semper tuma mi aliansa den boka,

¹⁷si bo no gusta pa Ami koregí bo i bo n' ta hisa mi palabranan fo'i suela?

¹⁸Kualke ladron ku bo topa ta bo amigu, bo ta sinti bo na kas den kompania di hende ku sa kibra matrimonio.

¹⁹Bo a hasi mal uso di bo boka i bo lenga ta blo saka mentira.

²⁰Bo ta sinta makistá bo mes ruman, ta kalumniá yu di bo mama.

²¹Eseinan ta loke bo a hasi, anto Ami lo mester keda ketu? Bo ta kere ku Mi ta manera bo? Lo Mi keha bo, konfrontá bo ku tur kos.

²²Komprondé e kos ei bon, boso tur, ku ta lubidá riba Dios, sino Mi ta sker boso na wèrki i lo n' tin hende pa salba boso.

²³Ken ku ofresé alabansa ta honra Mi, un hende asina ta habri kaminda pa Mi mustr'é salbashon di Dios.’