Read Papiamento Salmo 53 Bible Online

Salmo 53 - Papiamento bible

Salmo 53

¹Pa maestro di kanto. Na weis di ‘Mahalat’. Poema didáktiko di David. Hende bobo ta bisa den nan mes: ‘Ai nò, no tin Dios!’ Kos mahos i teribel nan ta hasi, ningun n' ta hasi bon.

²Dios ta mira abou for di shelu riba yunan di hende, pa weta si tin un ku tin sintí i ku ta buska Dios.

³Pero tur a kohe mal kaminda, tur a daña pareu. Nò, ningun no ta hasi bon, ni sikiera ún.

⁴Ma nan no sa nada antó, e hasidónan di maldat, ku ta kome mi pueblo bibu komo si fuera ta pan i ku nunka no ta resa na Dios?

⁵Te ora ku nan tembla di sustu, di sustu sin motibu, pasobra Dios ta plama wesunan di esnan ku ta sera bo aden; kon bo ta brongosá nan: pasobra Dios ta rechasá nan!

⁶O, mare salbashon di Israel por bini di Sion! Ora Dios kambia suerte di su pueblo, Yakob lo keda kontentu, Israel lo ta di fiesta!