Read Papiamento Salmo 55 Bible Online

Salmo 55 - Papiamento bible

Salmo 55

¹Pa maestro di kanto. Ku kompañamentu di instrumèntnan di kuèrdè. Poema didáktiko di David. O Dios, skucha mi orashon, no hasi surdu pa mi súplika!

²Hasi kaso di mi, kontestá mi, mi ta kana keha, sin sosiegu,

³aríbabou di gritamentu di enemigu, di e opreshon pa man di pekadó; nan ta baha desaster riba mi, furioso nan ta sigui ataká mi.

⁴Mi kurason ta krem den mi paden, ansha di morto ta kai riba mi;

⁵miedu, temblamentu ta kohe mi, un spantu enorme ta drenta mi.

⁶Mi di: si mi tabatin ala manera un palomba, lo m'a bula bai i lo mi tabata trankil.

⁷Sí, lo m'a bula bai mashá leu, kualke kaminda den desierto lo m'a keda.

⁸Mesora lo m'a buska protekshon ayanan kontra tempestat, kontra orkan.

⁹Destruí nan, Señor, bruha nan lenga, pasobra den siudat mi ta mira violensia i pleitu patruyando

¹⁰riba murayanan di dia i anochi; den stat mes ta reina krímen i mizeria,

¹¹ayaden ta yen di destrukshon; violensia brutu i engaño no ke kita for di riba kaya.

¹²Ai, no ku un enemigu ta insultá mi — lo mi por a wanta esei — o ku un rival ta lanta kontra mi, — lo mi por a skonde p'e —

¹³ma t'abo, un di mi hendenan, mi amigu, hòmber di konfiansa!

¹⁴Nos ta'ta biba na grasia ku otro; kon nos tabata bai kas di Dios meimei di e muchedumbre di fiesta...

¹⁵Laga morto kohe nan di sorpresa, ku nan por kai bibu den abismo, komo maldat ta na kas serka nan.

¹⁶Ma ami, mi ta sklama na Dios, SEÑOR lo trese mi salbashon.

¹⁷Anochi, mainta i mèrdia mi ta grita yora i keha: i enberdat E ta tende mi stèm.

¹⁸E ta duna mi libertat i pas for di esnan ku ta bringa ku mi, nan ku ta hopi, miéntras ami ta so.

¹⁹Dios ta skucha mi, lo E humiliá nan, E ku ta reina fo'i prinsipio, pasobra nan no ke arepentí, rèspèt pa Dios nan no tin.

²⁰Mi kompañero a hisa man kontra hende ku tabata na pas kuné, el a kibra laso di amistat.

²¹Su boka ta mas moli ku manteka, ma su kurason ta buska guera; su palabranan ta suave ni zeta, ma ta puñánan saká for di baliña.

²²Tira bo preokupashon riba SEÑOR, E mes lo perkurá pa bo: nunka lo E no pèrmití pa un hende hustu trompeká.

²³Ma Bo ta laga e otronan, o Dios, baha den pos yen di putrishon. Hende ku ta mata i gaña no ta kumpli ni mitar di nan añanan, pero ami ta konfia den Bo.