Read Papiamento Salmo 66 Bible Online

Salmo 66 - Papiamento bible

Salmo 66

¹Pa maestro di kanto. Un kantika. Un salmo. Hubilá Dios, abo, tera henter,

²kanta gloria di su nòmber mahestuoso, dun'É su alabansa glorioso!

³Bisa Dios: Kon tremendo ta bo obranan! Bo gran poder ta fòrsa bo enemigunan lora abou pa duna Bo homenahe.

⁴Tera henter lo adorá Bo, lo kanta pa Bo, kanta gloria di bo nòmber.

⁵Bini, mira obranan di Dios, temibel pa su echonan pa hende.

⁶El a kambia laman den tera seku — por a pasa den awa na pia; p'esei ban legra den djE.

⁷Ku su poder E ta manda eternamente, su mirada ta peilu nashonnan. Rebeldenan, no lanta kontra djE.

⁸Nashonnan, alabá nos Dios, laga su alabansa resoná;

⁹El a hasi nos biba di nobo i no a laga nos pia tambaliá.

¹⁰Bo a purba nos, sí, o Dios, Bo a laga nos dirti den krosèt, manera ora ta limpia plata.

¹¹Bo a laga nos kana den reda, a buta karganan pisá riba nos lomba.

¹²B'a laga hende subi nos kabes, nos a pasa den kandela, den awa, ma Bo a saka nos afó, duna alivio.

¹³Lo mi bai bo kas ku ofrendanan pa kima, pa ofresé Bo loke m'a primintí Bo,

¹⁴e loke mi boka a papia i loke m'a menshoná den mi ansha.

¹⁵Lo mi kima sakrifisio pa Bo di bestianan yen di sebu, laga huma di kabritu subi na Bo i ofresé Bo bue i karné.

¹⁶Bini, boso tende! Lo mi konta boso tur ku ta honra Dios, kiko El a hasi den mi bida.

¹⁷Pareu mi boka a yam'É ya mi lenga a kuminsá alab'É.

¹⁸Si mi tabatin mal intenshon, Señor lo no a skucha mi.

¹⁹Ma Dios a skucha mi di bèrdè, El a atendé mi orashonnan.

²⁰Bendishoná sea Dios, ku no a rechasá mi orashon i ku no a nenga mi su amor!