Read Papiamento Salmo 71 Bible Online

Salmo 71 - Papiamento bible

Salmo 71

¹SEÑOR, serka Bo mi ta skonde, hasi pa nunka mi no keda brongosá.

²Bo ta hustu: salba mi i libra mi, pone atenshon i salba mi!

³Abo sea un baranka di refugio, kaminda mi por bai tur ora; Bo a disidí di salba mi, pasobra Bo ta mi baranka, mi baluarte.

⁴Mi Dios, salba mi for di man di pekadó, for di gara di malbado i opresor.

⁵Pasobra Bo ta mi speransa, SEÑOR Dios, mi refugio for di tempu mi ta mucha.

⁶Fo'i ten m'a nase mi a lèn riba Bo, mi Yudador fo'i barika di mi mama. Na Bo mi alabansa pa semper!

⁷Pa hopi hende man di Dios a toka mi, ma Bo ta mi refugio fuerte.

⁸Mi boka ta yen di alabansa di bo splendor, tur dia di nobo.

⁹No rechasá mi, awor ku mi ta bieu; mi forsa ta bai, no bandoná mi!

¹⁰Pasobra mi enemigunan ta papia riba mi, nan ta wak mi, ta bati kabes huntu

¹¹i ta bisa: ‘Dios a bandon'é, ban kore su tras koh'é, e no tin hende pa salb'é!’

¹²O Dios, no keda leu fo'i mi, mi Dios, bin yuda mi lihé!

¹³Bèrgwensa i ruina riba esnan ku ta persiguí mi sin fin! Mare esnan ku ta buska mi desgrasia por ta tapá ku bèrgwensa i konfushon.

¹⁴Ma ami lo no keda sin konfia, lo mi alabá Bo mas i mas;

¹⁵Mi boka lo anunsiá bo hustisia, bo salbashon, tur dia di nobo, pasobra mi no sa su midí;

¹⁶lo mi konta di bo forsa, SEÑOR Dios, i proklamá bo hustisia sin igual.

¹⁷Dios, fo'i mi hubentut Bo a siña mi i te ainda mi ta gaba bo gran obranan.

¹⁸P'esei awor ku mi ta bieu ku kabei blanku, no bandoná mi tampoko, o Dios, te ora ku m'a kaba di konta di bo forsa i bo obranan grandi na tur hende di awor i di mañan.

¹⁹Dios, bo hustisia ta yega te na shelu, esta kos grandi Bo a hasi! Dios, ken ta manera Bo?

²⁰Ounke Bo a pèrmití pa mi a wanta hopi mizeria pisá, lo Bo bolbe duna mi bida i lo lanta mi for di fondo di tera.

²¹Mustra mi bo gran fabor i bolbe duna mi konsuelo.

²²Anto lo mi alabá Bo ku arpa, alabá bo fieldat, o mi Dios. Lo mi toka lira na bo honor, Abo, Dios Santu di Israel.

²³Ora ku mi kanta salmo pa Bo, mi lepnan lo bai hubilá, sí, henter mi ser ku Bo a salba.

²⁴Henter dia mi lenga lo move keda menshoná bo hustisia; pasobra brongosá i humiliá lo ta esnan ku ta buska mi desgrasia.