Read Papiamento Salmo 73 Bible Online

Salmo 73 - Papiamento bible

Salmo 73

¹Salmo di Asaf. Bèrdat, Dios ta bon pa Israel, pa hende ku nan kurason a keda limpi!

²Tòg mi pia a hera di slep, parumpinga mi a trompeká,

³pasobra mi tabata yalurs riba hende yen di arogansia, kada be ku mi tabata mira prosperidat di hende malbado.

⁴Molèster nan no konosé, nan kurpa ta gordo i salú.

⁵Tur hende tin problema — nan nò, tur hende ta haña sla — nan nunka.

⁶P'esei nan tin orguyo pa koyar, violensia komo paña pa nan kurpa.

⁷Nan kurpa ta asina gordo ku nan wowonan ta bula afó, nan kurason ta patapata di idea.

⁸Nan ta chèrchè i ta papia kos malu, ku mal airu nan ta papia di menasa.

⁹Nan ta lanta bos kontra shelu i nan lenga ta lora riba tera.

¹⁰P'esei pueblo ta sigui nan tras i ta bebe golos di nan awa.[62]

¹¹Nan ta bisa: ‘Kon Dios lo por sa? Dios Altísimo lo kai ariba antó?’

¹²Asina nan ta, e malbadonan, semper nan ta sin preokupashon i ketu bai nan ta bira mas riku.

¹³Ai, ta pòrnada antó mi a tene mi konsenshi limpi, mi a laba man den inosensia,

¹⁴miéntras mi ta tormentá henter dia i ta mortifiká tur mainta?

¹⁵Pero si, enkambio, lo m'a bisa: ‘Laga mi papia meskos ku nan’, mira, lo m'a bira infiel na e kompania di bo yunan.

¹⁶Mi a kibra mi kabes pa komprondé, ma e asuntu a keda preokupá mi,

¹⁷te ora ku m'a drenta Dios su tèmpel i m'a bin komprondé nan destino.

¹⁸Bèrdat, Bo ta pone nan pia riba un kaminda ku ta slep, Bo ta laga nan kai na ruina.

¹⁹Esta spantoso nan a bira diripiente! Ta dato! Peresé horiblemente!

²⁰Manera si nan tabata un soño di un hende ku ta spièrta, Señor, Abo tambe, ora Bo spièrta, Bo n' sa mes kon nan tabata.

²¹Ora ku mi sanger a daña i m'a kunsumí te den mi higra

²²mi tabata bobo, ignorante, un animal sin sintí Bo dilanti.

²³Sinembargo mi ta semper serka Bo, Abo ta tene mi man drechi,

²⁴ta guia mi segun bo plan i na final lo tuma mi den gloria.

²⁵Ken mi tin den shelu? Abo so! Si mi ta ku Bo, kiko mundu ta importá mi?

²⁶Maske mi kurpa i kurason por sukumbí Dios ta semper mi baranka, E ta mi poseshon, mi n' por pèrd'É.

²⁷Sí, esnan ku ta leu di Bo ta pèrdè; Bo ta destruí tur hende ku ta laga Bo pa sigui otro dios.

²⁸Pa loke ta toka ami mihó mi keda serka Dios; serka SEÑOR Dios mi tin mi refugio. Laga mi proklamá tur bo obranan!