Read Papiamento Salmo 77 Bible Online

Salmo 77 - Papiamento bible

Salmo 77

¹Pa maestro di kanto. Na weis di ‘Yedutun’. Salmo di Asaf. Mi ta sklama na Dios, mi ta grita, mi ta sklama na Dios p'E tende mi.

²Den mi ansha mi ta buska SEÑOR, ku mi man henter anochi na laria, sin kansa di pidi yudansa. Mi alma ta nenga konsuelo.

³Si mi kòrda riba Dios òf meditá, mi kurason ta kibra i mi ta keha.

⁴Bo n' ta laga mi wowo sera, mi t'asina turdí ku mi n' por papia.

⁵Mi ta pensa riba e dianan di ántes, riba añanan ku a pasa mashá ten.

⁶Anochi mi ta keda rekordá kon mi ta'ta kanta di SEÑOR; mi ta meditá profundamente, mi spiritu ta blo hasi pregunta:

⁷Señor lo rechasá nos pa semper? L'E no mustra su kariño nunka mas?

⁸Akaso su bondat a bai pa keda? Su promesa no ta sali nunka mas?

⁹SEÑOR a lubidá su kompashon? E ta asina rabiá ku E n' tin duele?

¹⁰Loke ta duel mi mas tantu t'e idea ku aktuashon di Altísimo a kambia!

¹¹Mi ta rekordá Dios su hazañanan, sí, mi ta kòrda bo milagernan di ántes.

¹²Mi ta pensa riba tur loke B'a hasi i mi ta meditá riba bo obranan.

¹³Tur loke Bo ta hasi, Dios, ta santu. Kua Dios ta mes grandi ku nos Dios?

¹⁴Abo, e Dios ku ta hasi milager, ku ta mustra nashonnan bo poder;

¹⁵ku a libra bo pueblo ku man fuerte, e yunan di Yakob i Jozef.

¹⁶O Dios, awa di laman a mira Bo, laman a mira Bo i a krem, el a sakudí te den su fondo.

¹⁷Nubianan a basha nan awa, bos a ronka den shelu, bo flechanan a kòrta bai bini.

¹⁸Zonido di bos a sigui lora, mundu tur na lus di welek, tera a tembla, sakudí.

¹⁹Bo kaminda a pasa den laman, Bo a kana den masa di awa: no por a mira bo pasonan!

²⁰Bo a guia bo pueblo, bo karnénan, pa man di Moises i Aaron.