Read Papiamento Salmo 78 Bible Online

Salmo 78 - Papiamento bible

Salmo 78

¹Poema didáktiko di Asaf. Mi pueblo, skucha mi siñansa, paga tinu na loke mi ta bisa.

²Mi ta bai habri mi boka pa un lès, habri sekretonan di tempu antiguo.

³Loke nos a tende i siña, loke nos grandinan a konta nos

⁴nos no ke tene sekreto pa nan yunan, sino konta e generashon benidero: esta gloria di SEÑOR, su poder, i e kosnan milagroso k'El a hasi.

⁵El a saka un dekreto pa Yakob i a pone un lei na Israel, anto El a manda nos grandinan pa nan siña nan yunan esei,

⁶pa e generashon benidero tambe sa, e yunan ku lo nase despues, i na nan turno nan lo konta nan yunan,

⁷pa nan tambe konfia den SEÑOR, no lubidá Dios su obranan grandi, sino mas bien opservá su mandamentunan;

⁸pa nan no bira manera nan grandinan, generashon kabesura i rebelde, generashon ku kurason solo birá, insinsero di karakter ku Dios.

⁹Efraimitanan, eksperto ku bog, a retirá riba dia di bataya.

¹⁰Nan no a warda aliansa di Dios, ni ker a biba konforme su lei.

¹¹Nan a lubidá su akshonnan, e milagernan ku El a demostrá nan,

¹²milagernan, den bista di nan grandinan, na Egipto, den yanura di Soan.

¹³El a parti laman i a laga nan pasa, El a laga awa para manera un dam.

¹⁴El a guia nan den dia den un nubia, henter anochi den lus di kandela.

¹⁵El a sples baranka den desierto laga nan bebe laman di awa.

¹⁶Fo'i baranka El a laga riunan brota i awa basha ku hopi stripada.

¹⁷Ma nan a sigui peka kontra djE, den desierto nan a lanta kontra Altísimo.

¹⁸Den nan kurason nan a pone Dios na prueba pidiendo kuminda na nan gustu.

¹⁹Nan a papia kontra Dios i bisa: ‘Akaso Dios por drecha mesa den desierto?

²⁰Bèrdat, El a dal e baranka: awa a brota i riunan a kore, ma lo E ta kapas di duna pan, l'E por mira pa su pueblo haña karni?’

²¹Asina ta ku SEÑOR a indigná, ora El a tende esei; kandela a sende kontra Yakob, a lanta un furia kontra Israel,

²²komo nan a pèrdè fe den Dios, nan no a kere ku l'E duna su yudansa.

²³Tòg El a duna su òrdu na e nubianan altu ayariba, i El a habri portanan di shelu;

²⁴El a laga mana yobe pa nan kome, El a duna nan trigo for di shelu;

²⁵hende a kome pan di angelnan, El a manda provishon pa nan te sobra.

²⁶El a lòs bientu di pariba for di shelu, a lanta bientu di zùit ku forsa grandi,

²⁷El a laga karni yobe riba nan manera stòf, mes tantu para ku tin santu na laman.

²⁸El a laga nan kai meimei den kampamentu, tur kaminda rondó di nan tèntnan.

²⁹Anto nan a kome nan barika yen, El a sirbi nan tur loke nan tabata gusta.

³⁰Apénas nan a plakia nan mester, — nan kuminda ainda den nan boka —

³¹ku furia di Dios a lanta kontra nan i a mata esnan di mas robusto, El a tumba flor di Israel.

³²Ku tur esei nan a sigui peka tòg, i no ker a kere den milagernan di Dios.

³³P'esei El a laga nan dianan pasa bai manera un rosea i a pone un fin spantoso na nan bida.

³⁴Ora El a laga algun di nan muri, e otronan tur a busk'É, a kombertí i a puntra pa Dios

³⁵i nan a kòrda ku Dios ta nan baranka. Dios Altísimo, nan Salbador.

³⁶Ma mashá labio, t'esei nan tabatin, nan lenga a sigui gañ'É;

³⁷nan kurason no tabata serka djE, nan no a keda fiel na su aliansa.

³⁸Ma E tabata sinti kompashon, El a pordoná nan nan kulpa i a keda sin kaba ku nan; kada be El a wanta su furia, i a keda sin baha su rabia.

³⁹E tabata pensa: Ta hende nan ta, un rosea ku ta bai sin bolbe.

⁴⁰Kuantu be nan a lanta kontra djE, kuantu be nan a amarg'É den desierto, den e mondi salbahe!

⁴¹Kada be nan a bolbe tenta Dios, probokando Dios Santu di Israel.

⁴²Nan no tabata kòrda kon su man a yega di libra nan fo'i man di enemigu,

⁴³ora den yanura di Soan na Egipto El a hasi kosnan grandi, milagroso;

⁴⁴kon El a kambia nan riunan na sanger, pa nan no bebe awa for di nan;

⁴⁵kon El a manda maribomba pa nan, ku tabata kome nan bibu i sapunan ku ta'ta hostigá nan.

⁴⁶El a laga nan kosecha pa badjaga, trabou di nan man pa dalakochi;

⁴⁷a destruí nan matanan di wendrùif i tur nan palunan di figo pa un yobida di pipita di eis;

⁴⁸El a laga piedra di eis mata nan bestianan di kria, anto El a laga bos kai riba nan trupanan di bestia chikí.

⁴⁹El a baha kandela di su furia riba nan, su ira, su rabia i angustia: delegashon di mensahero di desaster.

⁵⁰El a habri kaminda pa su furia, E no a spar nan di morto i a laga nan bestianan pa pèster.

⁵¹El a dal tur yu mayó di Egipto; El a mata den tèntnan di Ham promé fruta di nan potensia di hòmber.

⁵²Sinembargo El a laga su pueblo sali pafó manera karné; El a guia nan dor di desierto manera un trupa di bestia.

⁵³El a guia nan sigur, liber di miedu i nan enemigunan: laman a tapa nan!

⁵⁴El a hiba nan su tera santu, na e seru ku E mes a konkistá.

⁵⁵El a plama nashonnan nan dilanti, ku sinta El a midi e tera i a duna nan esei pa poseshon; El a duna tribunan di Israel nan tèntnan pa biba aden.

⁵⁶Nan a pone Dios Altísimo na prueba, nan a rebeldiá kontra djE i a nenga di warda su preseptonan,

⁵⁷pasobra manera nan grandinan nan a neng'É i a bira infiel, halando bèk manera un bog ku n' ta sirbi.

⁵⁸Nan a sar'É ku nan altánan pagano i a probok'É ku imágen di nan diosnan

⁵⁹Dios a ripará i a rabia, El a disgustá di Israel,

⁶⁰a bandoná su santuario na Silo, e tènt den kua El a biba bou di hende.

⁶¹El a laga e Arka bai fo'i tera — e señal di su poder i su gloria —, entregá den man di enemigu.

⁶²Rabiá ku su propio pueblo El a laga pa nan muri den masakre.

⁶³Kandela a devorá nan hóbennan i pa e yu muhénan den nan no a zona kantikanan nupsial.

⁶⁴Nan saserdotenan a kai pa spada sin ta yorá pa nan biudanan.

⁶⁵Pero Señor a spièrta manera fo'i soño, manera un sòldá, ora e bini bei despues di a bebe hopi biña.

⁶⁶El a saka lomba di enemigunan tur na blufein i a pone nan kara pa semper na bèrgwensa.

⁶⁷El a rechasá tènt di Jozef, E no a skohe tribu di Efraim;

⁶⁸tribu di Huda, esei El a skohe, Seru di Sion, su lugá preferí.

⁶⁹Aya El a traha su kas santu manera su bibá selestial, manera mundu, fundá pa tur semper.

⁷⁰David, su sirbidó, El a skohe, El a sak'é for di kuránan di karné

⁷¹i a yam'é for di tras di e mamanan, pa el a kuida Yakob, su pueblo, Israel, su mes propiedat.

⁷²El a kuida nan ku gran sinseridat i a guia nan ku man eksperto.