Read Papiamento Salmo 79 Bible Online

Salmo 79 - Papiamento bible

Salmo 79

¹Salmo di Asaf. Paganonan, o Dios, a invadí bo propiedat, nan a profaná bo tèmpel santu, laga Herusalèm bira un ruina.

²Kurpa di bo sirbidónan nan a laga komo kuminda pa para di shelu, karni di bo fielnan pa bestia feros.

³Manera awa nan a basha nan sanger tur kaminda rònt di Herusalèm; no tabatin ningun pa dera morto.

⁴Nos a bira mofa di bisiña, tur hende ku biba rònt di nos ta pil di nos, ta insultá nos.

⁵Te ki dia, SEÑOR! Bo ta sigui rabia pa semper? Yalurs ta sigui kima bo paden manera ta kandela?

⁶Baha bo rabia riba e nashonnan ku no ke rekonosé Bo, riba e reinonan kaminda nunka nan no ta invoká bo nòmber,

⁷pasobra nan a devorá Yakob i a ruiná su teritorio.

⁸No laga nos paga pa e pikánan ku nos antepasadonan a hasi; bo kompashon sali lihé na nos enkuentro, pasobra nos a pèrdè tur forsa.

⁹Abo, yuda nos, Dios Salbador, pa gloria di bo nòmber! Salba nos i kita nos pikánan pa gloria di bo nòmber.

¹⁰Ki mishi paganonan bisa: ‘Unda nan Dios ta?’ Mare ku dilanti di nos bista paganonan por yega na sinti kon Bo ta venga e sanger ku bo sirbidónan a drama.

¹¹Skucha keho dje prezunan i libra ku bo brasa poderoso esnan kondená na morto.

¹²Paga nos bisiñanan shete be bèk e ultrahe ku kua nan a falta Bo, Señor!

¹³Anto nos, nos ku ta bo pueblo, e karnénan ku Abo ta kuida, lo gradisí Bo pa tur eternidat i lo kanta bo alabansa den tur generashon.