Read Papiamento Salmo 83 Bible Online

Salmo 83 - Papiamento bible

Salmo 83

¹Kantika. Salmo di Asaf. O Dios, no keda sin papia, no keda ketu, sin move, o Dios!

²Tende nan borotá, bo enemigunan! Esnan ku tin odio kontra Bo ta lanta kabes.

³Nan ta forma un kòmplòt kontra bo pueblo, ta traha plan kontra esnan ku Bo ta kuida.

⁴Nan ta grita: Ban kaba ku e pueblo ei, di manera ku nòmber di Israel no keda menshoná nunka mas.

⁵Tur di akuerdo nan a deliberá, a sera un pakto kontra Bo:

⁶tèntnan di Edom i ismaelitanan, Moab i yunan di Hagar,

⁷Guebal, Amon i Amalèk, Filistea i habitantenan di Tiro;

⁸asta Ashur a sera ku nan, un gran apoyo pa yunan di Lòt.

⁹Trata nan manera Midian, manera Sísera, Yabin, na riu di Kishon;

¹⁰nan a keda destruí banda di En-Dor i a sirbi di mèst pa kunuku.

¹¹Trata nan lidernan meskos ku Bo a trata Oreb i Zeeb; hasi ku tur nan reinan manera ku Zèbag i Salmuna,

¹²ku a bisa: Ban poderá di e kunukunan fértil di Dios!

¹³Mi Dios, hasi nan manera plushi, manera bagas den bientu.

¹⁴Manera kandela ku ta kima un mondi, manera vlamnan ku ta kome seru limpi,

¹⁵persiguí nan meskos ku bo orkan; laga nan ta asustá pa bo tormento,

¹⁶Tapa nan kara ku bèrgwensa, pa nan puntra, SEÑOR, ken Bo ta.

¹⁷Laga nan ta humiliá i konfundí, keda brongosá i peresé

¹⁸i komprondé ku Abo so yama SEÑOR, alsá altu riba tur hende.