Read Papiamento Salmo 86 Bible Online

Salmo 86 - Papiamento bible

Salmo 86

¹Orashon di David. SEÑOR, skucha mi, kontestá mi, pasobra mi ta pober, sin amparo!

²Warda mi, mi ta bo amigu, Abo, mi Dios, salba mi, bo sirbidó ta konfia den Bo.

³Tene piedat di mi, Señor, henter dia mi ta sklama na Bo!

⁴Duna bo sirbiente alegria, ya ku ta na Bo mi ta alsa mi alma.

⁵Bo ta bon, Señor, i kla pa pordoná, yen di klemensia pa esnan ku ta invoká Bo.

⁶SEÑOR, skucha mi orashon, paga tinu na mi gritu di ousilio!

⁷Den mi ansha mi ta grita yama Bo, pasobra Abo lo tende mi sigur.

⁸Denter di diosnan, Señor, no tin ningun manera Bo, sin igual ta tur obra ku B'a hasi.

⁹Tur pueblo ku B'a traha lo bini pa adorá den bo presensia, Señor, i duna homenahe na bo nòmber:

¹⁰‘Grandi Bo ta, hasidó di milager, Abo, Dios, Abo so!’

¹¹Mustra mi bo kaminda, SEÑOR, pa mi andá sea konforme bo bèrdat; dirigí mi kurason na ún kos so: rèspèt, sin basilá, pa bo nòmber.

¹²Di henter mi kurason, Señor mi Dios, lo mi duna Bo alabansa i kanta gloria di bo nòmber pa semper.

¹³Pasobra grandi bo klemensia ta pa mi, i B'a salba mi dje abismo profundo.

¹⁴Dios, insolentenan a lanta kontra mi, un kuèrdè di burdugu ke mata mi, nan no ta tene kuenta ku Bo.

¹⁵Ma Abo, Señor, ta un Dios di ternura i gran mizerikòrdia, yen di pasenshi, bondadoso i fiel.

¹⁶Drei mira mi i tene kompashon, konsedé bo sirbidó bo fortalesa, salba e yu di bo sirbiente!

¹⁷Duna mi un prueba kla di bo bondat, pa esnan ku ta odia mi por mira, ku nan kara tur na bèrgwensa, ku t'Abo, SEÑOR, a yuda mi i konsolá mi.