Read Papiamento Salmo 88 Bible Online

Salmo 88 - Papiamento bible

Salmo 88

¹Un kantika, Salmo di yunan di Korag. Pa maestro di kanto. Na weis di ‘Mahalat’. Na ora di aflikshon. Poema didáktiko di Heman, e ezrahita. SEÑOR Dios, mi Salbador, den dia mi ta grita ousilio, anochi mi ta buska bo presensia.

²Mare mi súplika por yega serka Bo, tende mi, mi ta sklama na Bo.

³Mi kurason ta kargá di fèrdrit, mi ta serka reino di morto.

⁴Nan ta konta mi den esnan ku ya a baha den buraku, mi ta parse un hòmber sin forsa.

⁵Mi paradero ta denter di morto, manera esnan ku a muri den bataya i kende, drumí den nan graf, Bo a lubidá kompletamente: nan ta ranká for di bo man.

⁶B'a tira mi den e pos di mas hundu, den regionnan skur, den abismo.

⁷Bo furia ta duru riba mi, Bo a laga bo olanan suta mi.

⁸B'a alehá mi konosínan fo'i mi, Bo a duna nan disgustu di mi. Un prezu mi ta, sin salida,

⁹mi wowo ta skur di fèrdrit. Tur dia, SEÑOR, mi ta yama Bo i mi ta alsa mi mannan na Bo.

¹⁰Bo ta hasi milager pa mortonan? Spiritunan lo lanta pa alabá Bo?

¹¹Sa proklamá bo bondat den graf antó, bo fieldat den lugá di putrishon?

¹²Den e tiniebla ei nan sa di bo milagernan, di bo hustisia den e tera di olvido?

¹³Ma ami ta sigui sklama na Bo, SEÑOR, mainta ya mi orashon ta alkansá Bo.

¹⁴Pakiko rechasá mi, SEÑOR, pakiko skonde bo Kara pa mi?

¹⁵Fo'i ten mi ta'ta mucha mi a sufri i mi a biba na boka di buraku; m'a soportá kos teribel di bo parti, te pone man na kabes.

¹⁶Bo furia ta pasa riba mi, bo horornan ta kaba ku mi bida;

¹⁷nan ta rondoná mi henter dia manera un inundashon, tur pareu nan ta tapa mi abou.

¹⁸Bo a pone tur hende, ku tabata mi amigu i kompañero, alehá fo'i mi; awor ta skuridat ta mi kompaño!