Read Papiamento Proverbionan 1 Bible Online

Proverbionan 1 - Papiamento bible

Proverbionan 1

¹Ata e proverbionan di rei Salomon di Israel, yu di David.

²E proverbionan akí ta duna bo sabiduria di bida i ta koregí bo manera di biba; nan ta profundisá bo komprondementu di tópikonan difísil;

³nan ta prepará bo pa haña e korekshon ku ta kumbiní bo pa biba un bida ku ta bon den bista di Dios i di hende, pa trata tur hende sin hasi distinshon i pa ta un hende rekto.

⁴E proverbionan akí ta siña hende, ku no tin eksperensia den kosnan di bida, konosé bida. Esun hóben ta haña konosementu i ta siña kon skohe bon kaminda.

⁵Tambe e proverbionan akí ta laga e hende ku ta sabí kaba amplia su konosementu i esun ku ta inteligente kaba nan ta duna direkshon

⁶pa komprondé kosnan difísil manera proverbio, wega di palabra, charla i charada di hendenan sabí.

⁷Pa bo bira sabí bo mester tin rèspèt di Dios promé. Esun ku no tin rèspèt di Dios ta menospresiá sabiduria di bida i e no ta aseptá korekshon tampoko.

⁸Yu, tende di bo tata i di bo mama, no rechasá nan palabranan yen di sabiduria.

⁹Pasobra e palabranan ei ta drecha bo karakter manera un kadena òf un korona ta drecha aparensia di un hende.

¹⁰Yu, si pekadónan ke kalanchá bo, no tuma aden!

¹¹Si nan bisa: ‘Ban ku nos. Ban mata un hende. Ban ataká un inosente djis pa prèt.

¹²Ban no! E n' ta skapa, ban mand'é bibu reino di morto. Ni su sombra nan lo no mira mas. Ban yud'é bira skina.

¹³Nos lo haña tur sorto di rikesa; nos kasnan lo ta yen di kos presioso.

¹⁴Djòin nos, samsam ta parti e botin.’

¹⁵Yu, keda leu, kita for di nan kaminda.

¹⁶Pasobra ta gusta nan ta gusta maldat, nan ta kla pa mata hende.

¹⁷Meskos ku un para pa motibu di hamber tòg ta bula drenta un kui ku el a mira nan pone,

¹⁸asina nan pashon ta laga nan kai den e trampa ku nan mes a pone. Nan a sali pa drama sanger di otro hende, pero ta nan mes sanger ta kore.

¹⁹Asina ta pasa ku tur ku hasi nan mes riku na un manera deshonesto: ta nan mes graf nan ta koba.

²⁰Sabiduria ta grita, pafó riba kaya, i den parke e ta lanta su bos.

²¹Na porta di siudat, meimei di tur boroto, e ta grita bisa e hendenan:

²²Boso sin eksperensia di bida, kuantu tempu mas boso ta keda gusta ineksperensia? Kuantu tempu mas esnan ku ta bira lomba pa bondat ta sigui bira lomba? I e kènsnan? Kuantu tempu mas nan ta odia konosementu?

²³Si bo a bai tras di mi atvertensia, lo mi a habri mi kurason pa bo i laga bo sa mi pensamentu.

²⁴Pero pasobra bo a rechasá mi, ora mi a yama, i ningun hende no a paga atenshon, ora mi a saka man,

²⁵pasobra bo a rechasá mi bon konseho i no ker a tende di atvertensia,

²⁶p'esei lo mi hari bo mizeria tambe; hasi chèrchè ora bo drenta pániko.

²⁷Ora bo drenta pániko, ora mizeria ataká bo, diripiente, manera un tempestat, manera un warwarú i bo pèrdè rosea, sustu kohe bo kurpa,

²⁸e ora ei, sí e ora ei sí lo bo grita yama mi, pero kontestá lo mi no kontestá, e ora ei lo bo buska mi, pero keda sin haña mi.

²⁹Pasobra boso tabata rechasá tur konosementu i no tabata mustra di tin rèspèt di SEÑOR.

³⁰Boso no ker a tuma mi konseho i tabata despresiá mi korekshon.

³¹P'esei boso lo kosechá loke boso a sembra, e skupi ku boso a skupi na shelu, ta kai den boso mes kara.

³²Pasobra terkedat ta pone hende ku no tin eksperensia di bida bai pèrdí i indiferensia ta pone hende ku no tin rèspèt di Dios keda destruí.

³³Pero esnan ku ta tende di mi por biba trankil, nan no tin nodi di tin miedu ni sustu.