Read Papiamento Proverbionan 10 Bible Online

Proverbionan 10 - Papiamento bible

Proverbionan 10

¹Un yu hòmber sabí ta duna su tata legria un yu hòmber bobo ta duna su mama fèrdrit.

²Rikesa hañá na manera ilegal no ta duna probecho, honestidat ta libra di morto.

³SEÑOR no ta laga hende honesto keda insatisfecho, amor pa plaka E ta rechasá.

⁴Hende floho ta keda sin pariba sin pabou, hende trahadó ta bira riku.

⁵Es ku rekohé provishon den zomer ta sabí, es ku pèrdè ariba den tempu di kosecha ta trese bèrgwensa.

⁶Hende hustu ta yama bendishon riba e mes, mal hende, desgrasia.

⁷Rekordá bon hende ta rekordá bendishon, nòmber di mal hende ta putri bai.

⁸Hende sabí ta dispuesto na aseptá guia, pero hende bobo ku ta papia pa loko ta keda destruí.

⁹Hende íntegro, no mester di tin miedu, hende ku sigui mal kaminda lo pasa bèrgwensa.

¹⁰Es ku hasi seña tras di lomba di hende, ta kousa fèrdrit, hende bobo ku ta papia pa loko, ta kaba ku su mes.

¹¹Palabra di hende hustu ta fuente di bida, tras di palabra di mal hende tin violensia skondí.

¹²Odio ta kousa pleitu, pero amor ta tapa tur ofensa.

¹³Hende inteligente ta papia palabra sabí, hende bobo meresé sota ku palu.

¹⁴Hende sabí no ta kana bende grandi ku su konosementu, boka di hende bobo ta hala su desgrasia mas serka.

¹⁵Forsa di e riku ta su rikesa, debilidat di e pober su pobresa.

¹⁶Logro di hende hustu ta kondusí na bida, ganashi di pekadó ta pon'é hasi piká.

¹⁷Hende ku paga atenshon na disiplina ta riba kaminda di bida, hende ku nenga korekshon ta dualu.

¹⁸Hende ku skonde nan odio tin lep mentiroso, hende ku mala lenga no ta usa su sintí.

¹⁹Hende ku ta papia pa loko, fásilmente ta papia su boka forbei, hende ku ta poko di papia ta inteligente.

²⁰Loke hende hustu bisa ta di altu kalidat, pensamentu di mal hende tin tiki balor.

²¹Palabra di hende hustu ta alimento pa hopi hende, pero hende bobo ta muri pa falta di sintí.

²²Solamente bendishon di Dios ta hasi hende riku, e no ta bini ku ningun klase di doló.

²³Hende bobo ta gosa ora e hasi kos bochornoso, hende sabí ta gosa di loke tin di aber ku sabiduria.

²⁴Loke mal hende tin miedu di dje, ta sosodé kuné, pero loke hende hustu deseá ta bira realidat.

²⁵Ora tempestat kaba di pasa, mal hende a disparsé, pero hende hustu semper ta keda para firme.

²⁶Loke binager ta pa djente i huma ta pa wowo, un floho ta pa su doño di trabou.

²⁷Hende ku tin rèspèt di SEÑOR, ta biba largu, pero esnan ku no tin rèspèt di SEÑOR ta muri trempan.

²⁸Loke hende hustu tin di spera ta legria, mal hende no tin nada di spera.

²⁹SEÑOR ta sòru pa protekshon i pèrdishon, E ta protegé esnan ku siguiÉ, pero ta destruí esnan ku kometé inhustisia.

³⁰Nunka lo no kore ku hende hustu, mal hende lo no gosa di un lugá di biba na e tera primintí.

³¹For di boka di hende hustu ta brota sabiduria, pero lo kòrta lenga di hende perverso kit'afó.

³²Hende hustu sá kon skohe palabra na ora, pero fo'i boka di mal hende kos perverso so ta sali.