Read Papiamento Proverbionan 12 Bible Online

Proverbionan 12 - Papiamento bible

Proverbionan 12

¹Hende ku ke pa otro koregié, ta demostrá ku e ke siña, hende ku no ke pa otro koregié ta bobo.

²Es ku hasi bondat tin simpatia di SEÑOR, hende ku mal ehèmpel E ta kastigá.

³Maldat no ta sirbi komo fundeshi pa nada, pero un hustu ta manera un palu ku rais hundu.

⁴Un bon esposa ta pa su kasá manera un korona ta pa un rei, un esposa ku ta pone kara di su kasá na bèrgwensa, ta un enfermedat maligno ku ta kaba ku e esposo.

⁵Hende hustu ta pensa solamente riba hustisia, mal hende solamente riba engaño.

⁶Palabra di mal hende ta trampa mortal, palabra di hende hustu, salbashon.

⁷Mal hende ta kai, kaba na nada, hende hustu ta keda riba pia.

⁸Mas sabí, mas apresio; mas bobo, mas despresio.

⁹Mihó bo ta hende simpel i bo tin sirbiente, ku bo ta yen di idea, anto bo ta pasa mizeria.

¹⁰Hende hustu sa asta kiko nan bestianan ta sinti, mal hende no sa mes kiko ta kompashon.

¹¹Es ku plug su tera lo tin pan na abundansia, es ku biba di ilushon no ta usa su sintí.

¹²Antoho di mal hende ta plaka mal ganá; pero trabou di e hustu ta produsí algu en realidat.

¹³Un sakadó di mentira ta hoga den su mes mentiranan, pa un hende honesto semper tin salida.

¹⁴Hende ta rekohé fruta di loke nan bisa i risibí pago pa loke nan hasi.

¹⁵Den bista di hende bobo, semper é tin rason, pero hende sabí ta tuma bon konseho.

¹⁶Hende bobo ta demostrá su disgustu mesora, hende sabí ta skond'é.

¹⁷Testigu honesto ta papia bèrdat, testigu falsu ta para gaña.

¹⁸Palabra papiá pa loko ta hùrt hende profundamente, palabra na ora ta trese alivio.

¹⁹Palabra bèrdat ta dura pa semper, mentira no ta dura largu.

²⁰Mentira ta biba den kurason di esnan ku ke hasi maldat, pero esnan ku trese pas ta toka parti den alegria.

²¹Hende hustu ta keda ispar di mizeria, mal hende ta haña nan ku desaster tra'i desaster.

²²Hende ku ta gaña ta repugná SEÑOR, ma hende konfiabel ta agrad'É.

²³Hende sabí no ta kana broma ku nan sabiduria, pero hende bobo gusta kana show ku nan bobedat.

²⁴Hende trahadó ta dominá, hende floho ta otro hende ta dominá nan.

²⁵Sufrimentu ta deprimí hende, palabra amabel ta hasi hende kontentu.

²⁶Hende hustu ta bon guia pa su próhimo, mal hende ta pon'é riba kaminda robes.

²⁷Un yagdó floho ta keda sin ko'i kushiná, pero energia ta kos di gaba.

²⁸Hustisia ta e kaminda pa bida, un patruli seif kaminda morto n' ta drumi lur.