Read Papiamento Proverbionan 13 Bible Online

Proverbionan 13 - Papiamento bible

Proverbionan 13

¹Un yu sabí ta aseptá korekshon di su tata, un chèrchadó no ta hasi kaso ora hala su atenshon.

²Hende tin probecho di e bon ku e bisa, alimento di esnan ku no ta fiel na Dios ta violensia.

³Es ku kontrolá su palabranan ta kontrolá su mes, es ku papia pa loko ta ruiná su mes.

⁴Hende floho ta deseá i keda sin haña, hende trahadó ta prosperá.

⁵Hende hustu ta repudiá mentira abiertamente, pero es ku no ta fiel na Dios ta pasa bèrgwensa i pone hende haña rabia riba dje.

⁶Hustisia ta tene hende rekto riba bon kaminda, piká ta pone pekadó bai pèrdí.

⁷Tin hende ta hasi komo si fuera nan ta riku, pero nan ta planbarí; otro ta hasi komo si fuera nan ta pober, pero nan ta yen di propiedat.

⁸Ta eksigí plaka di un hende riku komo reskate pa su bida, hende pober nunka n' ta tende e menasa akí.

⁹Bida di hende hustu ta manera un lampi ku ta bria, bida di mal hende ta manera un lampi ku ta pagando.

¹⁰Hende orguyoso ta proboká pleitu, hende ku tuma konseho ta sabí.

¹¹Plaka hañá na un manera fásil i deshonesto ta bula bai, hende ku spar plaka pokopoko ta bira riku.

¹²Spera enbano ta pone kurason sufri, deseo kumplí ta bida largu.

¹³Hende orea duru mester karga konsekuensia, hende ku sigui bon konseho lo tin probecho.

¹⁴Palabra di hende sabí ta fuente di bida, nan ta salba bo for di gara di morto.

¹⁵Uso di sano huisio ta haña rekonosementu, manera di biba di infielnan no.

¹⁶Hende inteligente ta laga mira ku nan tin komprondementu, hende bobo ta kana broma ku nan bobedat.

¹⁷Un mensahero inkapas ta hinka su kurpa den problema, un embahador kapas ta logra den bida.

¹⁸Es ku despresiá konseho ta hañ'é ku pobresa i bèrgwensa, es ku aseptá korekshon ta keda respetá.

¹⁹Deseo kumplí ta bida largu, hende bobo ta repudiá e konseho ‘bira lomba pa maldat’.

²⁰Es ku anda ku hende sabí ta bira sabí, pero ai di esun ku ta amigu di hende bobo.

²¹Desaster ta persiguí pekadónan, prosperidat ta rekompensa pa hende hustu.

²²Te asta ñetunan di un bon hende lo heredá di dje, rikesa di mal hende ta keda akumulá pa al fin i al kabo kai den man di hende hustu.

²³Kunuku di hende pober por produsí kuminda na abundansia, pero inhustisia ta bari e kuminda bai kuné.

²⁴Hende ku nunka no suta nan yu, no ke e yu bon, hende ku sòru di straf nan yu, ta stim'é.

²⁵Hende hustu ta kome keda satisfecho, mal hende ta kome keda ku hamber.