Read Papiamento Proverbionan 14 Bible Online

Proverbionan 14 - Papiamento bible

Proverbionan 14

¹Ku sabiduria hende muhé ta konstruí su kas, pero ku bobedat e ta bash'é abou.

²Es ku biba segun Dios su palabra tin rèspèt di Dios, es ku no hasi loke Dios bisa ta despresi'É.

³Hende bobo ta kastigá su mes, ora e papia pa loko, pero salbashon di e hende sabí ta den su palabranan.

⁴Si bo n' tin bestia pa traha, bo mangasina ta keda bashí, pero forsa di bue ta sòru pa bon kosecha.

⁵Testigu hustu ta odia mentira, pero testigu falsu ta daña nòmber di hende.

⁶Hende ku gusta chèrchè di sabiduria nunka n' ta hañ'é, hende habrí pa sabiduria ta deskubrié fásilmente.

⁷Si ta palabra ku por yuda bo bo ke tende, keda leu for di hende bobo.

⁸Sabiduria ta: sa kon aktua, bobedat ta: no sa ku ta gaña bo ta gaña bo mes.

⁹Hende bobo ta hasi chèrchè ora mustra nan nan kulpabilidat, pero entre hende honrado tin bon boluntat.

¹⁰Ta bo so ta sinti bo tristesa kompletamente, meskos bo alegria: niun otro hende no por kompartié.

¹¹Famia di mal hende ta keda destruí, famia di hende rekto ta prosperá.

¹²Tin kaminda ku parse règt, pero na final, morto ta warda.

¹³Asta ora di hari, kurason por hasi due, i fin di alegria por ta doló.

¹⁴Hende perverso ta kosechá fruta di su mes echonan, pero bon hende tambe.

¹⁵Hende sin eksperensia ta kere tur kos ku bis'é, hende sabí mes ta pensa.

¹⁶Hende sabí ta sòru pa malu no influensi'é i ta keda leu, hende kabes habrí ta hasi kos sin pensa.

¹⁷Hende kabes kayente ta hasi kos di bobo, hende cha tiger ta pone hende haña rabia riba dje.

¹⁸Hende ku biba sin usa su sintí ta keda bobo, hende ku usa su sintí ta haña komprondementu.

¹⁹Mal hende lo baha kabes den presensia di bon hende, hende perverso na porta di bon hende.

²⁰Asta bisiña di e hende pober ta odi'é, pero hende riku tin mashá hopi amigu mes.

²¹Es ku despresiá su próhimo ta hasi piká, felis esun ku tin duele di hende pober.

²²Hende ku plania maldat, n' ta dualu nan lo dualu? Hende ku plania bondat, ta kosechá amor i fieldat.

²³For di tur esfuerso hende ta saka probecho, di djis papia pa numa solamente mizeria.

²⁴Korona di hende sabí ta nan rikesa, pero korona di hende bobo ta nan bobedat.

²⁵Palabra di un testigu konfiabel por skapa bida di un hende, loke sali fo'i boka di un gañadó ta engaño.

²⁶Es ku tin rèspèt di SEÑOR por tin konfiansa fuerte, e sa ku su yunan ta seif.

²⁷Rèspèt di SEÑOR ta fuente di bida, e ta salba bo fo'i gara di morto.

²⁸Mas hopi siudadano un rei tin, mas grandi su honor, falta di súpdito ta ruina di un hefe di pueblo.

²⁹Tene pasenshi ta muestra di hopi inteligensia, no tene pasenshi ta muestra di gran bobedat.

³⁰Hende trankil ta keda salú, pero envidia ta kome bai paden.

³¹Es ku oprimí hende pober ta ofendé Kreador, es ku demostrá amor pa hende pober ta honra Dios ku esei.

³²Mal hende ta keda ruiná pa su mes maldat, hende hustu ta sintié trankil, asta ora morto yega.

³³Sabiduria ta sintié na kas den mente di hende ku komprondementu, den profundo di nan kurason asta hende bobo mester rekonosé esei.

³⁴Hustisia ta hasi un nashon famoso, inhustisia ta bèrgwensa pa un nashon.

³⁵Un rei ta gosa un sirbidó sabí, pero su furia ta baha riba e sirbidó ku pone su kara na bèrgwensa.