Read Papiamento Proverbionan 15 Bible Online

Proverbionan 15 - Papiamento bible

Proverbionan 15

¹Palabra kariñoso ta plakia rabia, palabra brutu ta lant'é.

²Palabra di hende sabí ta demostrá komprondementu berdadero, for di palabra di hende bobo ta brota bobedat.

³Bista di SEÑOR ta tur kaminda vigilando bon hende i hende ku ta hasi maldat.

⁴Palabra suave ta pone bo biba di bèrdè, palabra perverso por destruí bo totalmente.

⁵Es ku no hasi niun tiki kaso di atvertensia di su mayornan ta bobo, es ku tuma un atvertensia na pechu ta sabí.

⁶Den kas di hende honrado tin gran abundansia, mal hende no tin probecho di su ganashinan.

⁷Palabra di hende sabí ta engrandesé komprondementu, pero palabra di hende bobo nunka.

⁸SEÑOR ta detestá sakrifisio ku mal hende ofresé, orashon di hende hustu E ta apresiá.

⁹SEÑOR ta repudiá loke mal hende ta hasi, pero ta stima esnan ku ta kore tras di hustisia.

¹⁰Es ku desviá di e bon kaminda ta haña kastigu pisá, es ku odia korekshon ta muri.

¹¹Si SEÑOR por mira den graf i den reino di morto, kiko ta para p'E mira den kurason di hende!

¹²Un hende ku a bira lomba pa Dios no gusta hende koregié, lo e no akudí na hende sabí.

¹³Kurason kontentu, kara kontentu, tristesa ta deprimí hende.

¹⁴Hende sabí ta okupá su mes ku konosementu, hende bobo ku ko'i kèns so.

¹⁵Pa hende tristu tur dia ta malu, pa hende kontentu tur dia ta fiesta.

¹⁶Preferibel pober i tin rèspèt di SEÑOR, ku riku, i ansha ta molestiá bo.

¹⁷Preferibel un plato di bèrdura kaminda tin amor, ku un porko gòrdá kaminda n' tin stimashon.

¹⁸Hende kabes kayente ta lanta rabia, hende ku pasenshi ta kalma pleitu.

¹⁹Kaminda di hende floho ta yen di sumpiña, kaminda di hende rekto no tin niun opstákulo.

²⁰Yu sabí ta hasi su mayornan kontentu, yu bobo ta menospresiá nan.

²¹Es ku no tin sintí tin e goso di bai tras di kos di kèns, pero hende ku sintí ta keda riba e kaminda règt.

²²Plannan ta frakasá pa falta di deliberashon, solamente ku hopi konsehero algu por bira realidat.

²³Ta dushi pa haña un kontesta korekto, i mas ainda ora e ta nèt na ora.

²⁴Kaminda di bida ta subi bai ariba i libra e sabí di baha den reino di morto.

²⁵SEÑOR ta destruí kas di hende orguyoso, di un biuda E ta protegé kada staka di kurá.

²⁶SEÑOR ta repudiá plan di mal hende, pero ta anhelá pa tende palabra ku ta yuda otro hende.

²⁷Es ku hasi ganashi riba lomba di hende ta perhudiká su mes famia, es ku no laga nan soborn'é ta biba felis.

²⁸Hende hustu ta pensa promé kiko e kontestá, pero fo'i boka di mal hende ta brota maldat.

²⁹SEÑOR ta tene su mes alehá for di esnan ku no ke tende nada di djE, pero ta skucha orashon di esnan ku ta tende di djE.

³⁰Wowo ku ta bria ta hasi kurason kontentu, bon notisia ta duna forsa nobo.

³¹Esnan ku tende ora koregí nan, ta haña un lugá entre hende sabí.

³²Es ku despresiá korekshon, no ta stima su mes; es ku tende ora koregié ta haña komprenshon.

³³Rèspèt di SEÑOR ta siña hende kon bira sabí, mester ta humilde promé ku risibí honor.