Read Papiamento Proverbionan 16 Bible Online

Proverbionan 16 - Papiamento bible

Proverbionan 16

¹Plan ta di hende, palabra final, di Dios.

²Tur loke un hende hasi ta bon den su bista, pero ta SEÑOR ta evaluá intenshonnan.

³Pone tur loke bo hasi den man di SEÑOR, i bo plannan lo realisá.

⁴Tur kos ku Dios a traha tin motibu di eksistensia, asta e mal hende pa dia di su kastigu.

⁵SEÑOR ta repudiá hende orguyoso, tardi òf trempan e hende ei ta haña su kastigu.

⁶Un aktitut di fieldat i rektitut ta drecha piká di pasado ku Dios, bo por evitá di hasi maldat si bo tin rèspèt di SEÑOR.

⁷Si loke bo hasi ta agradá SEÑOR, E ta hasi asta bo enemigunan, bo amigu.

⁸Mihó pober pero honesto, ku riku anto inhustu.

⁹Ta na hende pa traha plan, i na Dios pa dirigí hende su pasonan.

¹⁰Rei ta papia komo representante di Dios, e n' ta dikta sentensia inhustu.

¹¹SEÑOR ta interesá pa hende usa balansa ku ta pisa eksakto, ta E mes a fiha e pesonan.

¹²Reinan ta detestá hasimentu di maldat, komo nan meta ta: goberná a base di hustisia.

¹³Reinan ta stima i gusta mira hende ku ta papia bèrdat sin hasi trastu.

¹⁴Rabia di un rei por kosta un hende su bida; p'esei un hende sabí lo purba plakia e rabia ei.

¹⁵Si kara di rei ta alegre, esei ta nifiká bida, su bondat ta refreskante manera áwaseru.

¹⁶Optené sabiduria ta muchu mas mihó ku optené oro, haña komprondementu ta muchu mas di preferá, ku haña plata.

¹⁷Rumbo di hende hustu ta: kita for di kaminda di maldat, esun ku paga bon tinu kaminda e ta kana, ta salba su bida.

¹⁸Orguyo ta kana dilanti di frakaso, soberbia dilanti di kaida.

¹⁹Preferibel biba humilde ku pobernan, ku parti botin ku hende orguyoso.

²⁰Lo bai hende ku sa skucha Dios su palabra, bon, bendishoná ta esun ku ta konfia den Dios.

²¹Ta gaba un hende sabí pa su komprenshon, un palabra amabel ta konvensé mas lihé.

²²Sano huisio ta fuente di bida pa es ku tin e, pero un hende bobo ta kastigá su mes ku su bobedat.

²³For di un kurason sabí palabra sabí ta sali, un kurason sabí ta kambia pensamentu di hende fásilmente.

²⁴Palabra kariñoso ta e miel den kas di abeha, dushi pa alma i saludabel pa kurpa.

²⁵Tin kaminda ku parse règt, pero finalmente nan ta hiba bo na morto.

²⁶Apetit di trahadó a stimul'é pa traha ta su hamber a dun'é un empuhe.

²⁷Mal hende ta brota maldat, su lenga ta manera kandela.

²⁸Hende perverso ta kousa pleitu, hasimentu di redu ta kousa enemistat.

²⁹Ta un hende sin kompashon so ta gaña su amigu mustr'é kaminda robes.

³⁰Hende ku sera frenta ta pensa maldat pa hasi, hende ku a hasi maldat kaba ta morde lep.

³¹Kabei blanku ta un korona digno, ku bo ta gana ora bo biba segun Dios su palabra.

³²Tene pasenshi ta bal mas ku ser balente, dominá bo mes ta bal mas ku konkistá siudat.

³³Hende ta purba suerte, pero ta SEÑOR ta disidí, kon e piedranan ta kai.