Read Papiamento Proverbionan 17 Bible Online

Proverbionan 17 - Papiamento bible

Proverbionan 17

¹Kome pan duru i biba na pas ta bal mas ku fiesta hopi i pleita tur ora bai.

²Un katibu kapas ta remplasá un yu hòmber ku n' ta sirbi pa nada i heredá huntu ku e otro yu hòmbernan.

³Manera kandela ta refiná oro i plata, asina SEÑOR ta purifiká pensamentu.

⁴Hende ku ta hasi maldat gusta skucha mala lenga, un gañadó gusta tende blasfemia.

⁵Es ku hasi bofon di hende pober ta ofendé Kreador, esun ku tuma gustu den desgrasia di otro hende ta haña kastigu.

⁶Korona di hende bieu ta nan ñetunan; orguyo di yu, nan mayornan.

⁷Papia nèchi n' ta pas serka hende ku n' ta sirbi pa nada, ménos ainda mentira ta pas serka hende di karakter noble.

⁸Pa hopi hende plaka bou 'i mesa ta un piedra mágiko: tur kaminda por saka probecho for di dje.

⁹Es ku pordoná ofensa ta kultivá amistat, pero es ku keda ripití nan ta kore ku su amigunan.

¹⁰Un reproche ta hasi mas impreshon riba un hende ku konosementu, ku shen halá di sota riba un hende bobo.

¹¹Hende ku ta kontra tur kos ta buska problema, haña lo e hañ'é ku un funshonario ku no tin duele di dje.

¹²Mihó pone bo mes na peliger serka un oso ku nan a hòrta su yunan, ku serka un bobo ku a pèrdè su sintí.

¹³Si hende paga bon ku malu, maldat n' ta kita fo'i su porta.

¹⁴Kuminsá pleita ta manera traha buraku den dam; asina ta, légumai e motibu promé ku e pleitu kuminsá.

¹⁵Saka un kulpabel liber òf kondená un inosente: tur dos SEÑOR ta repudiá.

¹⁶Pakiko hende bobo ta bin kumpra sabiduria ku plaka den man, siendo e ta karesé di komprondementu?

¹⁷Un amigu ta stima semper, un ruman t'ei pa tempu di berans.

¹⁸Hende ku falta sabiduria ta primintí di para bòrg.

¹⁹Es ku gusta pleitu, gusta piká, es ku hunga grandi traha entrada di kas altu ta pidi pa su mes destrukshon.

²⁰Hende kurason falsu, no ta prosperá, es ku gusta saka mentira ta hañ'é den problema.

²¹Pa bo ta tata di un yu bobo ta doló so, pa bo ta tata di un yu kabes habrí n' ta un prèt.

²²Legria ta kura bo, fèrdrit ta kaba ku bo.

²³Hende ku n' tin Dios ta aseptá plaka bou 'i mesa, ketuketu, pa kambia rumbo di hustisia.

²⁴Bista di hende sabí ta fihá riba sabiduria, pero bista di hende bobo ta dualu sin tin meta.

²⁵Un yu bobo ta un disgustu pa su tata, pa su mama, un fèrdrit grandi.

²⁶No ta bon pa kastigá un hende inosente, ni pa kastigá un funshonario ku ta biba bon.

²⁷Papia poko ta kos di hende sabí, keda kalmu kos di hende inteligente.

²⁸Asta un hende bobo ta parse inteligente si e keda ketu, i sabí, tanten e no habri su boka.