Read Papiamento Proverbionan 19 Bible Online

Proverbionan 19 - Papiamento bible

Proverbionan 19

¹Mihó hende pober ku ningun hende no por mustra dede riba dje, ku hende bobo ku ta trose bèrdat.

²Si no tin saber di algu, zelo tampoko n' ta yuda; sòpi purá ta sali salu.

³Bobedat di hende mes ta pon'é dualu, pero hende ke kulpa Dios.

⁴Ora bo ta riku bo ta atraé kantidat di amigu, pero hende pober ta pèrdè esunnan ku e tin.

⁵Testigu falsu n' ta keda sin haña kastigu, un gañadó n' ta sali liber.

⁶Tur hende ta purba bira amigu di hende generoso. Tur kende ke ta amigu di esun ku ta duna regalo.

⁷Si asta ruman di un hende pober ta despresi'é, ku kuantu mas rason su amigunan lo no lag'é na kaya? Ounke e ta persiguí nan, roga nan, no por haña nan niun kaminda.[7]

⁸Es ku siña i apliká loke e siña, ta krese i mustra k'e ta stima su mes.

⁹Testigu falsu n' ta keda sin haña kastigu, un gañadó ta buska su morto.

¹⁰No ta pas pa un hende bobo bida den luho, pió ainda pa un katibu goberná su shon.

¹¹Hende huisioso no ta rabia lihé; ta respetá nan pasobra nan no ta tuma nada na malu.

¹²Ora rei rabia ta manera ora leon grita, pero su bon boluntat ta manera serena riba yerba.

¹³Un yu hòmber bobo ta kaba ku su tata, i muhé ku gusta pleita ta manera dak ku ta lèk.

¹⁴Hende por heredá kas i kapital di su mayornan, pero un esposa huisioso ta un regalo di SEÑOR.

¹⁵Flohera ta pone hende drumi duru, hende floho ta pasa hamber.

¹⁶Hende ku hasi loke manda nan, ta keda na bida, hende orea duru lo muri.

¹⁷Es ku demostrá amor pa hende pober ta honra SEÑOR, i SEÑOR lo pag'é pa loke el a hasi.

¹⁸Tanten bo ta disipliná bo yu, tin speransa ainda, no sea kómplise di su morto.

¹⁹Hende ku ta rabia muchu lihé ta hañ'é den problema, defend'é kontra kastigu ta hasi kos pió.

²⁰Skucha bon konseho, guli un skual mand'abou, t'asina so lo bo bira sabí.

²¹Plannan den kurason di hende ta hopi, pero ta plan di SEÑOR ta prevalesé.

²²Loke ta spera di hende ta lealtat, mihó hende pober i no ladron.

²³Rèspèt di SEÑOR ta pone hende biba, e ora ei hende ta sosegá trankil, sin ku problema ta molesti'é.

²⁴Un hende floho ta hinka su man den panchi, ma e n' ta ni hiba e kuminda na su boka.

²⁵Hende sin eksperensia den kosnan di bida ta siña ora kastigá esun ku a bira lomba pa hasi bondat, hende sabí ta siña ora koregié.

²⁶Maltratá tata i saka mama fo'i kas, ta aktonan bergonsoso i reprobabel pa un yu.

²⁷Mi yu, si bo keda sin tende ora skual bo, bo ta alehá bo di bon konseho.

²⁸Testigu falsu ta hasi chèrchè di hustisia, for di mal hende ta brota maldat.

²⁹Kastigu pa e chèrchadó ta fihá kaba; e palu pa dal riba lomba di hende bobo ta kla poné.