Read Papiamento Proverbionan 20 Bible Online

Proverbionan 20 - Papiamento bible

Proverbionan 20

¹Biña ta pone hende chèrchè, bibida stèrki ta pon'é borotá, hende bou di influensia no ta aktua ku sabiduria.

²Un rei furioso ta manera un leon ku ta grita; ken ku probok'é, ta pone su bida na peliger.

³Hende ta gana rèspèt dor di evitá pleitu, hende bobo ta kla pa rabia.

⁴Un hende floho no ke plug den tempu di prepará kunuku; e ta puntra su mes sí den tempu di kosecha: ‘Ta kon bini mi n' tin kosecha?’

⁵Intenshon den kurason di hende, ta un awa hundu, pero un hende ku komprenshon ta sak'é bini ariba kuné.

⁶Hopi hende ta gaba nan mes bondat, pero fieldat berdadero, unda por haña esei?

⁷Hende hustu ta komportá ireprochabel: felis e yunan ku e laga atras.

⁸Ora un rei sinta riba su trono pa husga, e ta sefta tur maldat ku su wowo.

⁹Ken por bisa: ‘Mi a purifiká mi kurason; mi a keda limpi sin piká?’

¹⁰Pisa ku dos peso, midi ku dos midí, SEÑOR tin repudio di e kosnan ei.

¹¹Hende ta ripará asta na un mucha, si e mucha su kondukta ta puru i bon.

¹²Ku nos por tende, ku nos por mira, ta obra di SEÑOR esei.

¹³No drumi di mas, pa bo no bira pober; lanta trempan, ya bo por tin di kome.

¹⁴‘Esta mal merkansia! Esta un produkto barata!’, e kumpradó ta bisa, pero unabes ku el a kumpra e kos e ta kana blòf ku su kompra.

¹⁵Oro tin hopi, piedra presioso tin na abundansia, pero boka ku ta papia ku sabiduria ta un hoya skars.

¹⁶Tuma su mantel, pasobra el a para bòrg pa un strañero, sigurá bo mes kontra dje, pasobra e ta responsabel pa strañeronan.

¹⁷Pan hòrtá ta smak dushi na prinsipio, pero despues e ta manera santu den bo boka.

¹⁸Bon konseho ta hasi un plan mas firme; pa bai guera mester di un bon strategia.

¹⁹Hasidó di redu no sa warda sekreto; no drenta ku hende ku ta papia hopi asina.

²⁰Si bo despresiá bo tata i bo mama, bo ta muri un morto hororoso.

²¹Un herensia eksigí na prinsipio promé ku tempu, no ta resultá un bendishon na final.

²²No pensa mes di tuma vengansa, warda riba SEÑOR i E lo libra bo.

²³SEÑOR ta repudiá uso di peso falsu, balansa ku hende a kònkel kuné no ta bon.

²⁴SEÑOR ta dirigí hende su pasonan, kon hende por sa anto na unda su destino ta kondusí?

²⁵Es ku primintí Dios algu sin pensa, ta pone trampa p'e mes, pasobra ora ta lat kaba, e ta puntra su mes si e por kumpli ku e promesa.

²⁶Un rei sabí ta desenmaskará kriminalnan, l'e kastigá nan sin mizerikòrdia.

²⁷Lampi di SEÑOR ta manera rosea di hende, e ta penetrá te den bo padennan ayá.

²⁸Amor i fieldat ta protegé un rei; amor ta hasi su gobernashon mas fuerte.

²⁹Orguyo di hòmber hóben ta nan forsa, fama di ansiano, nan edat altu.

³⁰Sla ku ta heridá ta purifiká nos di maldat, halá 'i sota ta limpia e partinan mas skondí di nos kurason.