Read Papiamento Proverbionan 21 Bible Online

Proverbionan 21 - Papiamento bible

Proverbionan 21

¹Meskos ku hende ta guia awa manda via kanal, lag'é kore kaminda hende ke p'e bai, asina SEÑOR ta guia pensamentu di rei.

²Segun hende tur loke e hasi, ta bon, pero ta SEÑOR ta husga intenshonnan.

³Hasi loke ta bon i loke ta hustu, SEÑOR ta preferá mas ku sakrifisio.

⁴Mirada di menospresio i kurason orguyoso — un aktitut asina — ta piká.

⁵Plan bon pensá ta duna bon resultado; pero sòpi purá ta sali salu.

⁶Es ku bira riku dor di engaño, ta kore tras di bientu; un bida asina ta bo morto.

⁷Violensia di esnan ku no tin Dios, lo lastra nan bai kuné, pasobra nan a nenga di hasi loke ta bon.

⁸Komportashon di esnan ku ta hasi maldat ta inkonfiabel, akshon di hende honrado ta limpi.

⁹Mihó biba na punta di un dak, ku den henter un kas, ku un muhé ku ta buska kestion.

¹⁰E úniko kos ku un mal hende ke, ta hasi maldat; e n' ta spar ni su amigu.

¹¹Ora kastigá un chèrchadó, esun sin eksperensia ta haña sabiduria, ora instruí un hende sabí, esaki ta haña konosementu.

¹²E Dios hustu ta opservá kas di hende ku ta hasi maldat, i hiba nan na nan destrukshon.

¹³Es ku sera orea pa yamada di hende pober, lo no haña oido ora e mes grita pidi yudansa.

¹⁴Regalo duná den sekreto ta plakia rabia, i plaka di soborno skondí den yas ta kalma e ira di mas pisá.

¹⁵Ora hustisia ta reina, ta legria pa hende hustu, pero t'un kos hororoso pa esun ku ta hasi maldat.

¹⁶Hende ku desviá di e kaminda ku ta duna komprenshon, lo sosegá den kompania di morto.

¹⁷Hende ku gusta plaser lo bira pober; es ku gusta paranda lo no bira riku nunka.

¹⁸Hende falsu i esnan ku ta hasi maldat lo sufri na lugá di hende hustu i honesto.

¹⁹Mihó bo biba bo so den un desierto, ku bo biba ku un muhé ku beis i ku ta buska pleitu.

²⁰Ta den kas di hende sabí so bo ta haña plaka i zeta kostoso, hende bobo lo kaba semper tur kos ku e tin.

²¹Es ku kore tras di hustisia i amor, lo haña bida berdadero, hustisia i honor.

²²Un hende sabí ta ataká un siudat bon defendé, i kaba ku e forsa ku nan a konfia riba dje.

²³Es ku sa ki ora e papia, n' ta hañ'é den problema.

²⁴Nòmber di es ku ta orguyoso i sinbèrgwensa ta ‘chèrchadó’ e tin mashá idea.

²⁵Deseo di un hende floho ta su morto, pasobra e ta nenga di pone man na obra.

²⁶E ta bisa: ‘Duna mi, duna mi no! Mi ke mas!’ Pero un hende hustu tin semper pa duna.

²⁷Sakrifisio di mal hende ta detestabel, kuantu mas ainda ora nan ofres'é ku mal intenshon.

²⁸Lo kaba ku testigu falsu; pero es ku sa skucha, semper lo por duna testimonio.

²⁹Mal hende ta traha kara inosente, hende hustu ta traha riba su komportashon.

³⁰Sabiduria humano, komprenshon i bon konseho, ta kai pèrdè ora un hende dirigí su mes na Dios.

³¹Bo por prepará kabai pa bai guera, pero viktoria ta dependé di Dios.