Read Papiamento Proverbionan 26 Bible Online

Proverbionan 26 - Papiamento bible

Proverbionan 26

¹Meskos ku sneu n' ta pas den temp'i kalor i áwaseru n' ta pas den temp'i kosecha, asina honor n' ta pas pa hende bobo.

²Meskos k'un mòfi ta bula bula pasa i k'un souchi ta bula pasa bai, asina un maldishon no meresí, nunka n' ta alkansá bo.

³Zuip ta pa kabai, bosal pa buriku, i palu, pa lomba di hende bobo.

⁴No duna hende bobo kontesta bobo, sino no tin diferensia mas entre abo kuné.

⁵Kontest'é segun su bobedat sí, sino e ta kapas di kere ku e ta sabí.

⁶Konfia hende bobo lag'é hasi rospondi pa bo ta manera kòrta bo mes pia kita afó i buska problema pa bo kurpa.

⁷Meskos ku e pianan di un paralítiko no tin forsa, asina un proverbio ta den boka di un hende bobo.

⁸Mara un piedra na un slengu, ta mes sin sentido ku honra hende bobo.

⁹Un rama den man di un buraché, un proverbio den boka di un hende bobo, tur dos ta ko'i spetakel.

¹⁰Es ku tuma hende bobo i hende k'e n' konosé den servisio, ta manera un tiradó 'i flecha ku ta tira pa loko.

¹¹Hende bobo ku ta keda ripití su bobedat, ta manera un kachó ku ta bolbe kome loke el a saka.

¹²Bo konosé un hende ku ta haña su mes mas sabí ku tur hende? Sa antó ku tin mas speransa p'un hende bobo ku tin p'e.

¹³E floho ta bisa komo preteksto: ‘Mi n' por sali pafó! Tin un leon ta kana rònt eifó!’

¹⁴Manera un porta ta drei den su skarnirnan, asina un floho ta bòltu riba su kama.

¹⁵Un floho ta manera un hende ku ta hinka man den panchi, pero ta haña muchu molèster pa hiba e kuminda su boka.

¹⁶Un floho t'un hende ku ta haña su mes sabí, mas sabí ku shete hende ku sano huisio.

¹⁷Un hende ku kana pasa i mete ku un pleitu k'e n' ta den, ta manera un hende ku ta kohe un kachó tene na su rabu.

¹⁸Hende bobo ku ta hunga ku flecha na kandela i arma mortal,

¹⁹t'e hende ku ta gaña su amigu i bisa despues: ‘Ta wega m'a hasi’.

²⁰Sin palu kandela ta paga, sin hasimentu di redu, pleitu ta baha.

²¹Manera karbon ta pa karbon sendé i palu ta pa kandela, asina e buskadó di problema ta den startmentu di pleitu.

²²Hende ta guli redu manera pan kayente, e ta baha bai te den nos paden aya.

²³Palabra bunita for di un kurason ku mal intenshon ta manera un bañ'i plata riba un pòchi di klei.

²⁴Hende ku mal intenshon ta skonde tras di loke e bisa, pero den su kurason e ta warda mentira.

²⁵Maske su palabranan ta amabel, no ker'é, pasobra shete kos mashá perverso ta yena su kurason.

²⁶Ounke e ta trata di skonde su odio, su maldat n' ta keda sin sali na kla.

²⁷Es ku koba un pos pa otro, e mes ta kai aden. Es ku skupi na laria, den su kara e ta kai.

²⁸Es ku papia malu di hende, ta odia su víktimanan, pero un hasidó di trastu tambe ta buska pa kaba ku hende.