Read Papiamento Proverbionan 28 Bible Online

Proverbionan 28 - Papiamento bible

Proverbionan 28

¹Es ku ta biba sin Dios, ta hui sin tin niun hende ta persiguié, es ku biba ku Dios, ta sintié protegé, ta manera un leon.

²Na un pais kaminda kada hende ta hasi únikamente loke ta bon den su mes bista, e gobièrnu n' ta sinta largu, pero kaminda tin un gobernador ku inteligensia i konosementu, stabilidat ta dura.

³Un hende pober ku ta eksplotá un otro hende pober ta mes desapuntante k'un nubia di awa ku ta rementá laba tur kosecha bai kuné.

⁴Es ku n' ta wòri ku Dios su palabra, ta kurashá mal hende, pero es ku tene kuenta kunÉ, ta resistí nan.

⁵Mal hende n' ta komprondé hustisia, pero esnan ku ta buska SEÑOR ta komprond'é kompletamente.

⁶Preferibel pober i honesto, ku riku i deshonesto.

⁷Es ku aten'é na loke a siñ'é, ta un yu inteligente, es ku anda ku hende kabes habrí, ta pone kara di su tata na bèrgwensa.

⁸Kapital di hende ku a bira riku dor di ranka sanger di hende, finalmente ta bira di e hende ku ta generoso ku hende pober.

⁹Si kualke hende sera orea pa lei, asta su orashonnan ta detestabel.

¹⁰Es ku guia hende hustu hib'é riba mal kaminda, ta kai den su mes trampa, pero hende hustu ta sali di bon.

¹¹Un hende riku ta kere ku e ta sabí, pero un pobersitu ku ta inteligente ta kohe su maña.

¹²Ora hustunan tin motibu pa gosa tur hende ta djòin e fiesta, ora mal hende ta na mando, tur hende ta skonde.

¹³Es ku skonde su pikánan no ta progresá, pero es ku rekonosé nan i evitá nan, ta haña pordon.

¹⁴Felis e hòmber ku tin rèspèt di SEÑOR, hende kabesura ta buska su mes desgrasia.

¹⁵Un mal hende ku ta goberná un pueblo pober ta meskos ku un leon ku ta gruña òf un oso ku ta ranka sali pa ataká.

¹⁶Tin dos tipo di gobernador: esun sin sintí, ku ta biba riba kustia di e pueblo i esun ku ta nenga plaka bou 'i mesa i ta goberná hopi tempu.

¹⁷Es ku tin un morto riba su konsenshi, ta keda hui te dia e muri; no laga niun hende kere ku nan por kita efekto di Dios su kastigu.

¹⁸Esun ku tin un komportashon ireprochabel ta keda protegé pero es ku sigui kaminda perverso ta kai diripiente.

¹⁹Es ku plug su tera lo tin pan na abundansia, es ku biba di ilushon lo bira pober.

²⁰Hende fiel ta haña hopi bendishon, pero hende haragan pa plaka n' ta keda sin haña kastigu.

²¹Tuma parti pa hende ta algu malu, pero p'un pida pan bo ta kla pa hasié.

²²Hende haragan ta kore tras di rikesa, sin sa ku pobresa ta ward'é.

²³Es ku koregí un hende, al fin i al kabo lo haña mas apresio k'esun ku tin un lenga ku trastu.

²⁴Es ku hòrta su tata òf su mama, i bisa: ‘N' ta nada’, ta kompinchi di esun ku ta destruí.

²⁵Hende haragan, ta sembra desunion so. Lo bai hende ku konfia den SEÑOR, bon.

²⁶Es ku konfia den su mes, ta bobo, pero es ku anda ku sabiduria ta keda protegé.

²⁷Es ku yuda hende pober, nunka lo n' tin falta di nada, pero es ku sera wowo pa nan nesesidat, ta keda maldishoná.

²⁸Ora mal hende bini na poder tur hende ta bai skonde, pero ora nan peresé, hende hustu ta prosperá.